Miriam Russel Women’s College-o Heath Awareness Program-ko ong·ata

TURA: World Health Day-ko maniani bak gita Mongolbar salo, Tura-ni Miriam Russel Women’s College-o Health Awareness Program-ko ong·atangaha aro ia program-o Dr. Icylda A Sangma (Pathology), Dr. Menokichi D Sangma (Dental Surgeon) aro Narbecca Momin (Clinical Psychologist), Resource Person ba skigiparang ong·e bak ra·angenba, an·seng baljoke dongani bidingo chatrirangna agan-talatanirangko on·angaha.
Ia Health Awareness program-ko ong·atanio Dr Icylda A Sangma, Human Immunodeficiency Virus (HIV)-ni bidingo agan-talataniko on·angengon, HIV-ko 1981 bilsio USA a·songo man·chengaha aro India a·songoba ia sabisiko 1986 bilsio man·chengaha ine parakataha.
HIV-na 2004 bilsio samko man·ahaoba ian virus ba jo·ongko bon·atsrangna man·gipade ong·ja indiba be·eno jo·ong jelrikrikjana gita bi·sa pe·rikrikaniko champengnasan man·aia ineba Dr Sangma talataniko on·angaha.
Meghalaya a·dokoba HIV-ko man·giparang sak 10,000-na baten dongaha ine janapatengon, ianoni sak 326-de Garo Hills-onin ong·a ine Dr Sangma aganaha.
HIV sabisini batrikrikna man·gipa cholrangni gimin janapatskaengon, sabisi man·gipa baksa tubrin dongbrinachi, apsan bijiko mande sakgni jakkaldimachi, sabisi man·gipa ma·gipaoni bi·saona aro an·chi on·grikanichiba batrikrikna man·a ine Dr Sangma aganenba, sabisini chinrangko nikna man·on, hospital-rangona re·ange porikka ra·e nichina gita didiangaha.
Ia program-o Dental Surgeon Dr Menokichi D Sangma, Oral Health ba ku·sikko an·seng baljoke rakkiani bidingo agan-talatanirangko on·angskaengon, pangnan salo changgni dake, chong·motan pringo changsa aro attamo changsa dake wagamko natjringchina ku·pattianiko on·angaha.
Ta·makku jakkalaniko gelchina didiangengon, pangnan Indian Dental Association (IDA)-ni ra·chakgimin toothpaste-rangkosa jakkalchina aro wagam natani brush-koba jabriprakon dingtangko jakkalchina gita Dr Sangma ku·pattiangaha.
Bon·kamao, Clinical Psychologist Narbecca Momin, Mental Health ba gisikni gita an·seng baljokaniko rakkina nangani gimin aganangskaengon, bang·a manderangan gisikni gita dongtogijani ba neng·nikanirangko man·on, skatang dakna skani gisikrang sokbaronga, uni gimin iandakgipa manderangna simsak nirokaniko on·na nangchongmota ine agan-ku·pattianiko on·angaha.
Gisikni gita dongtogijaniko man·enggipa manderangko man·a dipet ta·raken doctor-rangona rimange, uamangni neng·nikanirangko ma·sie ra·na nanga ineba Momin aganaha.
Iana skang, Miriam Russel Women’s College-ni Principal Dr Jobylline D Shira, ia program-o skie on·na re·bagipa manderangna rimchaksoani kattarangko aganangenba, an·seng baljoke donganiara mandeni janggi tanganio skanggipa dakna nanggni kaman ong·a ine aganaha.