SHILLONG: Meghalaya a·doko niam gri koela bikotaniko 2014 bilsio National Green Tribunal (NGT)-ni champengatanichi samtangtango ong·telaigiparangko chel·chakani pal batesa niam gri koela bikotani aro salruraanirang batroroaha ine United Democratic Party (UDP)-ni MLA aro gitcham Cabinet Minister Kyrmen Shylla parakataha.
“Koela bikotaniko champengachi darangba namgniko man·jawa aro ian sorkarina ba manderangnaba maming namgni dongjawa. Koela bikotaniko champengatanichi naljokaniko ba samtangtango ong·telaigiparangko chel·chaknaba man·jawa,” ine Shylla aganaha.
Manderangna janggi tangani cholrangko on·an baksana samtangtango ong·telaigiparangna nangchakeaniko chel·chakna gita niamrangko taridape aro ra·gatna nanganirangko ra·gatenba, skango gitan manderangna koelarangko bikotna on·piltaichinaba ua a·dok sorkariko didiataha.
Koela bikotaniko champengatanina jegale Jaintia Coal Miners & Dealers Association (JCMDA)-ni jinma re·jomaniko ong·atanio chakpaaniko parakatengon, “Manderang maming saloba ong·gija kamrangkode ka·na nangnikjawa. Manderangna sorkarini niamrangko ra·gate on·anikosa uamang nangnikenga. Niamrangko taridape aro ra·gate on·genchimosa manderangba ja·rikna man·gen,” ine UDP MLA aganaha.
Koelarangko bikotanio naljokaniko on·na man·gipa niamrangko ra·gate on·na nangengani giminba Shylla aganaha.
“An·ching naljokaniko on·na man·gipa niamrangko ra·gatna man·a, jekai chirangko chiringona watna skang chekna nangani, a·a den·aniko champengani aro gipinrang. A·a den·aniko champenganichiba an·ching naljokaniko on·na man·a,” ine Shylla talataniko on·angaha.
Gipin cholrang dongjani giminsa manderang, niam gri koelarangko bikotna draatako man·enga ine janapatengon, niam gita koelarangko bikotna man·na gita niamrangko ra·gate on·china UDP MLA, a·dok sorkariko didiataha.
NGT-ni champengatani ja·man a·doko niam gri koela bikotani bataha: UDP
Date:
Share post:
