SHILLONG: Umiam Lake-ni Lumpongdeng Island-o five-star hotel aro spa-ko kulianiara, samtangtango ong·telaigiparangna nangchakeaniko ra·bagen ine dingtang dingtang dolrang jegaltokengon, ia Umiam Lake-o donggipa Lumpongdeng Island-o nokrangko rikkamna on·jawa ine a·dokni Chief Minister Conrad K Sangma talataniko on·angaha.
Lumpongdeng Island-o five-star hotel aro spa kulina tik ka·aniko jegale Bristibar saloni Green Tech Foundation (GTF)-ni membor-rang, Shillong songjinmani Secretariat sambao okumu chake jingjengatna a·bachengatani ja·man a·dokni Chief Minister, iani bidingo talataniko on·angaha.
Iani bidingo kobor ra·timgipa manderang baksa agangrikengon, sorkari aro Tourism department-ni Memorandum of Understanding (MoU)-o soi ka·grikanion, ia biapo nokrangko rikkamna gitade on·ani dongja ine Chief Minister parakataha.
Lumpongdeng Island-o Taj Resort aro Spa-ko kulikamna sienga ine agananiara kakket ong·ja ineba Chief Minister parakataha.
“Ia biapo program-rangko ong·atengmiting somoirangosan pandal aro stall-rango rikna on·aigen aro program-rang matchotani ja·mande iandakgipa pandal aro stall-rangko pe·e galpilaigen,” ine Sangma aganaha.
Iandakgipa pandal aro stall-rangko antisa ba sal 10-mangnasan donaigen aro ian ia chichangna ba chichango donggipa sam-bol aro do·o-matrangna maming nangchakeaniko ra·bajawa ineba Chief Minister talataniko on·angaha.
Ia project-ko ra·chakanio sorkari, Forest department-ni dongimin niamrango pangchakesa ra·chakaha indiba ia biapo nokrangko rikkamnade on·jawa inen songgigrikanio soi ka·aha ineba Chief Minister parakataha.
Ia talatanichi jegalenggipa dolrang aro manderangna ma·siataniko on·na ka·dongenga ineba ua aganaha.
Umiam Lake-ni Lumpongdeng Island-o five-star hotel aro spa-ko rikna gita acre 66 ong·gipa a·arangko Indian Hotels Company Limited (IHCL)-na sorkarini on·na tik ka·aniko GTF jegalenba, ia project-ko den·galpilchina gita sorkario dabiengachim ine nikna man·a.
