SHILLONG: Byrnihat Outpost-ko chu·gimik Police station dakataha, ian a·jao manderangni naljokanina aro niam riti-rangko mikkangchi bilakdapatna ja·ku de·ani chin ong·a ine parakataha.
Gital Byrnihat Police station-ko Sonibar salo Byrnihat-ni MeECL Inspection Bungalow-o Cabinet Minister for C&RD, GAD aro SAD, Sosthenes Sohtun-chi oprakaha, Deputy Inspector General of Police (DIG) Shri V.S. Rathore, IPS, Superintendent of Police (SP) Shri Giri Prasad M, IPS, baksana sakgipin a·gipi official-rang, jatko dilgiparang aro manderangba dongpaaha.
A·jao jedakgipa neng·nikanirang sokbaoba uarangko warachakna bilakdapataniko nanga aro a·doko tom·tomaniko aro chel·chakaniko rakkiangna sorkarini dakchakaniko man·angkuenga ine Minister aganaha. Neng·nikani somoio dakchakaniko ta·rake on·angna man·a aro manderangna gimikni gita kamrangko ka·e on·angna man·a ia police station tang·dodapataha ine ua aganaha.
Police station-ona tang·doatanio district police aro administration-ni jotton ka·anina DIG uni katta aganani somoio de·mittelangaha aro professional ong·giparang baksa niam ritirangko be·atgija kimkim ong·e rimchina police-ni on·kanganiko aganangaha.
Sorkari aro a·gipi official-rangna uamangni dakchakanina Superintendent of Police de·mittele aganangaha, gitalgipa Police station, Byrnihat aro uni wilwilao donggipa biaprangna police-ni kam ka·aniko bilakdapatna aro nambate am·sandianiko dakna man·gnok ine ua aganaha.
Oprakani somoio dingtang dingtang department-rangoni official-rang, joltangni dilgiparang aro songdonggiparang dongpaaha, a·jao manderangni naljokanina aro namgija dakgipa kamrangko champengna, tom·tomaniko rakkianio mongsonggipa kamrangko ka·na ka·dongsoenga ine janapangaha.
