SHILLONG: Meghalaya a·doko rel ramarangko tarina man·chipjaengani gimin a·dok sorkari, rel project-rangna chamatgipa gong kror 200 tangkarangko Railway Ministry-na on·atpilaha.
Kobor on·timgiparangni u·iatani gitade, ia tangkarangko on·atpilchina gita Railways Ministry didiatahani gimin maming chol dongjae a·dok sorkari, gong kror 200 tangkarangko ma·mong sorkarina on·atpilna nangaha.
“Tangkarangko adita salrangna skangsan bank-ona on·atpilaha aro ia kamni transaction matchotama matchotkujaenggen ukosa chinga ma·sija,” ine kobor on·timgiparang parakataha.
Railways Ministry-na on·atpilgipa gong kror 200 tangkarangara, Tetelia-Byrnihat Railway project-ni tangkarang ong·achim indiba ia project-ko bilsi 10 ong·pilahaoba a·bachengna man·chipjahani gimin tangkarangko on·atpilna nangaha ine kobor on·timgiparang parakataha.
Ia Tetelia-Byrnihat railway project-ara kilometer 21 ong·gipa rel rama ong·achim aro ianoni km 2.3-de Meghalaya a·dok ning·o ong·achim.
Ia project-na hisapni gitade gong kror 1532 ong·achim aro ia railway project-ni kamrang, Assam a·dokchipakde matchotna siengahachim indiba Meghalaya a·dokchipaksa, dingtang dingtang dolrang jegaltokahani gimin a·bachengna man·chipjahachim.
Meghalaya a·doko, mongsongbate Khasi-Jaintia Hills a·jarango rel ramarangko tarina man·chipkujaengon, dingtang dingtang dolrang baksa chanchirimchengesa ja·kurangko de·gen ine a·dok sorkari aganskaaha aro iani bidingo sorkari, committee-koba songaha. Indake ong·genchimoba, ia committee da·onan changsaba tom·na man·kujaenga ine nikna man·a.
Meghalaya a·doko niam gri napsrukanirangko champengna gita Inner Line Permit (ILP)-ko ra·gatchenggijade rel garirangko ra·bana man·jawa ine dingtang dingtang dolrang raken jegaltokengachim.
Rel project-na on·atgipa kr 200 tangkako a·dok sorkari on·atpilaha
Date:
Share post:
