Dingtang dingtang dilgiparangko rim·anina Dadenggre-ni CSO-rang jegala

DADENGGRE: Batanggimin jao Garo Hills-o so·sojengjeng ong·angani ja·man FIR ka·anio pangchake, dingtang dingtang civil society organization (CSO)-ni dilgiparangko police-rang dokkol ka·e roenga aro mitamrangkode rim·enga ine Dadenggre-ni dingtang dingtang dolrang parakatenba, iani bidingo Dadenggre-ni Civil Sub-Divisional Officer (SDO)-na badi ka·doangaha.
So·sojengjeng ong·engmiting somoirango ia dolni dilgiparang, tom·tomaniko ra·bana gitasa songni nokni manderang baksa agangrike kamrangko ka·dilahachim indiba police-rang, da·o dingtang dingtang dolni dilgiparangko rim·skaenga ineba Dadenggre-ni CSO-rang parakataha.
Dadenggre CSO-rangni SDO-na badi ka·doangani gitade, CSO-ni dilgipa saksako Dadenggre-ni police-rang, manderangni gam-jinrangko nisie galanina aro so·sojengjeng ong·atanina Bharatiya Nyaya Sanhita (BNS) aro Meghalaya Maintenance of Public Order Act (MMPO)-ni dingtang dingtang section ning·o FIR ka·anio pangchake, April-ni 11 tariko, Dadenggre Police Station-o mikkangpaechina okamataha.
Ia dilgiparangni kosako matnanganirangara, sakkirango ba mikrontangchi nikgipa manderangni agananio pangchakani ong·ja indiba manderangni jangbingbanganio pangchakesa matnangani gita nika ine janapatengon, tom·tomaniko ra·bapilna kam ka·gipa dilgiparangko rim·aniara, ding·chaoataniko ra·baani cholrangba donga ine Dadenggre-ni CSO-rang parakataha.
CSO-ni dilgipako rim·na skang, medical check-up ka·anikoba Dadenggre-ni dingtang dingtang dolrang raken jegalataha.
“Medical check-up-rangkode police-rang rim·ani ja·mansa ka·rongachim indiba ia dilgipakode rim·na skangan medical check-up-na rimangaha aro ian CSO-ni dilgipako jinmani mikkango kratcha·atna dakani gitasa ong·a,” ine Dadenggre-ni CSO-rang parakataha.
Dilgiparangni kosako basee FIR ka·ani aro police station-rangona okamaniara, manderangni gisepo kenaniko aro sorkario ka·dongna man·gijaniko ong·atenga ineba Dadenggre-ni CSO-rang parakataha.
Indake ong·engon, dilgiparangni kosako FIR ka·aniko jakgitele sandirokchina aro sandirokengmiting somoirango dilgiparangni kosako police-rangni dokkol ka·aniko dontongchina gitaba Dadenggre-ni CSO-rang didiataha.
Dadenggre jolrango tom·tomaniko rakkiangna gita Sub-Divisional Administration aro CSO-rangni gisepo tom·aniko ong·atchina gitaba CSO-rang didiataha.