TURA: Re·anggipa March jao, Garo Hills-o adita salrangna so·sojengjeng ong·angani somoio, a·kawe jolo donggipa Chibinang Bazar-o Miriam-ni statue ba mangkrongko nisie galanina police-rang, komibeoba sakdok manderangko rim·aha ine West Garo Hills a·jani police-rang u·iataha.
Police-rangni u·iatani gitade, Chibinang Bazar-o donggipa Miriam-ni mangkrongko nisie galanina police-rang, Tura-ni MDC Bernard N Marak-ni FIR ka·na skangan sandirokna a·bachengataha aro iani bidingo komibeoba sakdok manderangko rim·na man·aha.
Adita salrangna skang, BJP-ni state vice president aro Tura-ni MDC Bernard N Marak, Chibinang-ona re·ange, so·sojengjeng ong·ani somoio nisie galgipa biaprangko niangani ja·man, ia mangkrongko nisie galanina FIR ka·gen ine parakatahachim.
“Jolo songdongenggipa manderangni angna aganatani gitade, ua somoio Phulbari-ni gitcham MLA aro gitcham MDC Esmatur Mominin, manderangko ding·chaoatani a·selsa ia jolrango so·sojengjeng ong·na a·bachengaha. Manderang ka·a ding·chaoenba, Chibinang bazaar-o donggipa dokkanrangko aro manderangni dongchakenggipa nokrangkoba so·e galaha. Uasan ong·aigija mitam manderang, Jisu Kristoni statue-koba nisie galaha,” ine Marak, Chibinang-ona re·angani ja·man parakatahachim.
Chibinang Bazar-o Jisu Kristoni mangkrongko nisie galaniara Kristianrangni kosako chadrapaniko mesokanisa ong·aha ine janapatengon, iandakgipa kamrangara niamkosan pe·a ong·ja indiba Indian Constitution-ni ning·o jakgitele olakkina bil man·aniko aro dingtang dingtang jatrangni gisepo tom·tome janggi tanganiko golmal ka·aniba ong·a ine BJP-ni state vice president parakataha.
Indake ong·engon, re·anggipa March jao so·sojengjeng ong·anina da·o dipet police-rang, sak 40-na baten manderangko dolgnionikon rim·na man·aha ine West Garo Hills a·jani Police-rang parakataha.
“March-ni 9 aro 11 tarikni gisepo salgittammangna so·sojengjeng ong·anina police-rang, dolgnini membor-rangkon rim·aha,” ine Police-rang parakataha.
