WILLIAMNAGAR: Adita salrangna skang, Songsak jolo donggipa Dagal Nachikol songo, be·enni gita cholgri ong·gipa mande saksako, doke siatanio jak donggipa manderangoni sak 15-kode rim·na man·aha ine East Garo Hills a·jani police-rang parakataha.
Koborko on·ani gitade, re·anggipa April-ni 8 tariko, Dagal Nachikol songo be·enni gita cholgri ong·gipa mande saksa Talseng T Sangma-ni nokona dolsa manderang, atterangko aro batdilrangko ra·e re·angenba, uko kragija dake chadrapeaha aro uni jikgipa aro uni budepa pagipakoba ka·saninggija dake dokahachim.
Dokako man·e Talseng Sangma, bilongbee mata bu·anirangko man·aha aro uko uni ma·drangrang ta·raken sanna bananiko on·na gita Songsak PHC-ona ra·angahachim. Indake ong·genchimoba, uni obostarang namjabatahani gimin uko Williamnagar Civil Hospital-ona ra·angchina doctor-rang aganataha aro uko Williamnagar Civil Hospital-ona ra·angengmiting somoion ua janggi galaiahachim.
Ia a·selni bidingo sianggipa mandeni nokdang aro ma·drangrang, April-ni 9 tariko Williamnagar Police Station-o FIR ka·aha aro FIR-o Dagal Nachikol songni sak 13 manderangko aro Nangapa songoni sakgittam manderangko dos dakgiparang ine biming mingahachim.
Indake ong·engon, ia a·selna FIR-o biming minggipa sak 16 manderangoni sak 15-kode rim·na man·aha aro saksade police-rangoni kate dongkuenga ine East Garo Hills a·jani police-rang parakataha.
