TURA: Bristibar salo, West Garo Hills a·jani dingtang dingtang skulrango poraienggipa chatro chatrirangna, District School Education Office-ni gita District Level Science, Mathematics & Environment Exhibition 2025-26-ko Tura-ni Dakopgre-o donggipa SMELC Building-o ong·atangaha.
Ia Science Exhibition-ko ‘STEM for Viksit & Atmanirbhar Bharat’ ine pangchakaniko done ong·ataha aro ia exhibition-o West Garo Hills a·jao donggipa dam 10 skulrang bak ra·angtokaha.
Ia exhibition-ko ong·atanio, West Garo Hills a·jani gitcham DSEO SK Saha, mongsonggipa sokgipa ong·e, jinmana aganprakangengon, a·songni dal·roroanio aro mandeni janggi tanganio maikai Science-ara mongsonggipa bak gita ong·a, iarangni gimin janapangenba, bida budiko ra·engon, lekka ki·taprangosan pangchakaigija an·tangtangni gisikrango ma·sidapna skaniko ong·atchina, chatro chatrirangko didiangaha.
Ia exhibition-o an·tangtangni u·i-ma·siani aro changa sapanirangko jakkale, dingtang dingtang project-rangko tarie mesokahani giminba ua chatro chatrirangko mittelpilangaha.
Ia District Level Science, Mathematics & Environment Exhibition-o Tura-o donggipa Bidanchi Higher Secondary School-ni Chedora N Marak, hydroelectric power generation system-ni project-ko tarie skanggipa boksisko man·aha aro Tura Rootland Secondary School-ni Dalkam Chuango M Sangma, solar-powered irrigation system-ni project-na gnigipa boksisko man·skaaha.
Gittamgipa boksisko Tura Public School-ni Gareth Ashton A Sangma, hybrid solar & wind energy model-na man·aha aro brigipa boksisko Tura Little Blossom Higher Secondary school-ni Marchiesa P Marak-na vertical farming & hydroponics project-na on·skaaha.
West Garo Hills District level exhibition-o chegiparang, da·o re·baenggipa May-ni 11 aro 12 tarikrango Shillong-o ong·atna manchienggipa State Level Science Exhibition-o district-tangni pal bakko ra·anggen aro state level-o chegiparang, national level Science exhibition-o bak ra·angskagen ine official-rang parakataha.
