SHILLONG: Garo Hills Autonomous District Council (GHADC) election-o, United Democratic Party (UDP) dolba chu·gimik dam 29 seat-rangon uamangni candidate-rangko susaatna miksongenga ine party President Metbah Lyngdoh mnisalo parakataha.
Kobor ra·timgiparangna Lyngdoh-ni parakani gitade, party candidate-rangko baseanio matchotmanahachim, election-na skang so·sojengjeng ong·ahani gimin GHADC election dondipatna nangao ga·akaha. Indake ong·genchimoba pilak constituency-rangon candidate-rang chu·gimik tarisamsoenga ineba Lyngdoh aganaha.
Candidate-rangko baseengon Garo Hills-oba UDP party-na chakgiparang bang·rorobaengani namgipa koborko man·soenga ine aganengon, “Indake jensalo chinga candidate-rangko basena a·bachengaha unon chinga namggipa koborrangko man·aha ine angade agangen,” Lyngdoh parakaha.
Uandake candidate-rang election-o name dakna an·tangtangko on·kangenga. “Re·baenggipa GHADC election-o uamangni ku·chaka gita ong·genma chinga chingni candidate-rangko nigen,” ineba ua agandapaha.
GHADC election-o chakatna Schedule Tribe Certificate-ko nangchongmotgipa dakchina aro Separate Electoral Roll-ko tarichina dabie A·chik a·songni manderangni jingjengate so·sojengjeng ong·ani ja·man April 10 tariko election ong·atna am·aniko jadokna ra·doataha ine nikna man·a.
