TURA: Raksamgre Range Forest Office-ni ning·o donggipa Rongsai Garo Hills Autonomous District Council (GHADC) Forest Beat Office-ni obosta namsrangjahani a·sel, ia beat office-o kam ka·enggipa officer-rang aro forest guard-rang neng·nikanirangko chagrongna nangtokenga ine A·chik Dedicated Integrity Leaders (ADIL) parakatenba, ia Rongsai Forest Beat Office-ko gital dake rikpiltaichina GHADC-ko didiataha.
Iani bidingo ADIL-ni dilgiparang, GHADC-ni Chief Executive Membor (CEM) Dhormonath Ch Sangma-na memorandum-ko on·angaha aro ia memorandum-o ADIL-ko dilenggiparangni parakatani gitade, ia Rongsai Forest Beat office-ni obosta namsrangjahani a·sel beat office-o kam ka·enggipa manderang neng·nikanirangko man·na nangtokenga.
“Ia beat office nokni obosta namsrangjahani a·sel officer-rang aro forest guard-rang, an·tangtangni kamrangko ka·anio neng·nikanirangko chagrongna nangtokenga. Kam ka·giparang, name ka·na man·jaengani a·selan buring bolgrimrangko nirokanio nangchakeanikoba man·skaengaha,” ine ADIL-ni president Jack Sangma, GHADC-ni CEM-na sedoatgipa chittio parakataha.
Da·o wachi kari sokbaengahani gimin ia office nok namjani a·sel kam ka·giparang neng·nikanirangko man·batna siengaha ine janapatengon, ia Rongsai GHADC Forest Beat Office-ko taridapna ba gital dake rikpiltaina tangka paisarangko chamatchina ADIL-ni dilgiparang, GHADC-ni CEM-ko didiataha.
