Khasi, Garo ku·sikko Official Language dake ra·gatanina GSU mittelpila

TURA: Meghalaya a·doko English ku·sik baksana Khasi aro Garo ku·sikrangkoba Official Language dake ra·gatahani gimin Zikku Balgra N Marak-chi dilenggipa Garo Students Union (GSU), Meghalaya sorkariko mittelpilataha.
Adita salrangna skang, Meghalaya Cabinet-ni tom·anio, Meghalaya State Language Act 2005-ko ra·galenba, a·doko English ku·sik baksana Khasi aro Garo ku·sikkoba official language dakna gita Meghalaya Official Languages Ordinance 2026-ko ra·chakangahachim.
A·doko Khasi aro Garo ku·sikkoba Official Language dake ra·gatahani gimin Meghalaya sorkariko mittelpilangengon, ian Khasi aro Garo manderangni cultural identity, man·rikani aro nangnikaniko chu·sokatani ong·aha ine GSU-ni president Zikku Balgra N Marak parakataha.
“Manderangni ku·agananiara, agangrikna jakkalmangmangaigipa cholsan ong·ja indiba jatni janggiba ong·a. Khasi aro Garo ku·sikko Official Language dake ra·gatanichi, jatgnini manderangna ku·tangchian sorkarini kamrango, lekka porao aro kakket bichalo cholrangko ra·na sorkari oe on·aha. Ia ku·sikrangko Official Language dake ra·gataniara, songadam nokadamrango janggi tangani gadangko mangrakbatatan baksana Meghalaya a·dokni ku·aganani, sea jotani aro itihasko re·baenggipa chasongrangna ripinge rakkinaba dakchakani ong·gnok. Iandakgipa ja·kuko de·aniara, dingtang dingtang jatrangni gisepo ku·mong nangrimaniko bilakbatatna aro gipin a·dokrangnaba dakmesokani gita ong·aha,” ine GSU president parakatenba, iani bidingo a·dokni Chief Minister aro Meghalaya Legislative Assembly-ni pilak membor-rangkoba mittelpilangaha.
Ia ja·ku de·aniko pilak sorkari department-rango, skulrango aro public institute-rangoba name ja·rikanggen ineba GSU president, an·tangni ka·dongchakenganiko parakataha.