Jatgnini manderang tom·tomaniko ra·bapilna ku·rachakgrika
TURA: Re·anggipa March jao, jatgnini gisepo ding·chaogrike so·sojengjeng ong·angani ja·man da·o a·kawe jolrango tom·tomaniko ra·bapilna aro jatgnini gisepo meli-nangrime janggi tangangna gita Budbar salo jinma tom·bimonganiko Chibinang Bazar-o ong·atangaha.
So·sojengjeng ong·angani somoio ma·sina man·gijagipa manderangni nisie galgipa Jisu Kristoni statue ba mangkrongkoba apsan salon, Chibinang Bazar-o jinma songe donangpilaha. Ia statue-ko Hashanuz Zaman-ni dilanichi Muslim jatni manderang taripile on·aha aro ia statue-ko tarianio chu·gimik korosrangkoba uamang an·tangtangan gamaha.
Ia tom·bimonganiko ong·atanio, Dadenggre-ni Civil Sub-Divisional Officer (SDO), Demdema-ni Block Development Officer, police officer-rang, Kristian toromni dilgiparang, Muslim dilgiparang, Hindu dilgiparang, songni nokni Nokma-Sordarrang, dingtang dingtang NGO-ni membor-rang aro jolo songdongenggipa manderangba bak ra·angtokaha.
Ia tom·anio dingtang dingtang official-rang aro dilgiparang aganprakangengon, Jisu Kristoni statue-ko nisie galanina raken jegalangtokaha aro tom·tomaniko rakkichina gitaba didiangaha.
Indake ong·engon, jatgnini gisepo tom·tomaniko rakkiangna, niamrangko rakkina, so·sojengjeng ong·atna jotton ka·giparangko champengna aro jatsa jatgipin baksa dakchakgrike janggi tangangkuna gitaba ia tom·anio ku·rachakgrikangaha.
