SHILLONG: Garo Hills Autonomous District Council (GHADC)-o Administrator’s Rule (AR)-ko ra·gatgenchimode, District Council-ni niamrangko taridapanio aro dingtang dingtang kamrango altuae chu·sokatna man·jawa ine GHADC-o AR ra·gataniko a·dokni Deputy Chief Minister aro District Council Affairs (DCA) Minister Prestone Tynsong jegalataha.
District Council-ni niamrangko taridapna aro kamrangko matchotatna gitasa GHADC-ni term-ko jadokna ra·dodapataha ine janapatengon, GHADC-o Administrator’s Rule-ko ra·gatgenchimode, iandakgipa kamrangko jakgitele ka·na man·jawaha ine Tynsong parakataha.
District Council-ko sorkari jako ra·genchimode uan Administrator gitasa ong·gen indiba Administrator-ni sason ka·genchimode, District Council-ni Rule-rangko aro Act-rangko taridapgipa Bill-rangkoba pass ka·na man·jawa maina iandakgipa Bill-rangko pass ka·ani bilde Council-o aro Executive Committee-osa ong·a ine Deputy Chief Minister aro DCA Minister parakataha.
GHADC-o taridapna nanggipa niamrangko man·chape, bangki dongenggipa kamrangko matchotatna gitasa GHADC-ni term-ko ra·dodapataha ineba Tynsong, gisik ra·atpiltaianiko on·angaha.
GHADC-ni term-ko ra·dodapani pal Administrator ba Governor’s Rule-ko ra·gatskachina gita Tura-ni MDC aro BJP-ni state vice president Bernard N Marak baksana dingtang dingtang dolrangba dabiengachim ine nikna man·a.
GHADC-ko chalaianio jak on·china gita didie, adita salrangna skangsan Tura-ni MDC, a·dokni Governor-na memorandum-koba on·angahachim.
Re·anggipa March jao Garo Hills-o so·sojengjeng ong·ahani gimin April-ni 10 tariko ong·atna tik ka·gipa GHADC election-ko sorkari dontongatenba, GHADC-ni term-ko jadokna ra·dodapatahachim.
