TURA: Garo Hills Autonomous Disrict Council (GHADC)-ni Taxation Department, Governor-ni ra·chakkugijagipa kajinarangko ra·enga ine Tura-ni MDC aro BJP-ni state vice president Bernard N Marak matnangatenba, niam gri kajina ra·aniko niatchina GHADC-ni Chief Executive Membor (CEM) Dhormonath Ch Sangma-ko didiataha.
Iani bidingo GHADC-ni CEM-na sedoatengon, Taxation Department-ni niam gri kajina ra·aniko champengchina Marak didiatenba, Governor-ni ra·chakani gri kajinarangko ra·aniara niamni a·palo ong·a aro iana kacharirangoba ra·biani cholrang donga ine parakataha.
Mobile company-rang, petrol pump-rang aro bank-rang, bading chiwalani kamrangko chalaina gita niam gita on·gimin lekkarangko nangchongmota ine janapatengon, jolting MDC-ni recommendation gride darangnaba Trading for Non-Tribal (TNT) licence-rangko on·jachina Tura MDC didiataha.
Joltang MDC-ni recommendation gri Tura jolo bang·en TNT man·giparang donga ine janapatengon, iandake niam gri TNT licence ra·enggiparangni kosako rakgipa ja·kurangko de·china Marak, GHADC-ni CEM-ko didiataha.
