Phulbari: All Assam Minority Students Union (AAMSU)-mo agangipa aro mejamangmang ja·ku de·gipa jeon uamangni jegalgipa program aro Meghalaya-ni kosako economic sanction-rangko parakatako man·chape April 24 tariko Garo Students’ Union (GSU) press-ni gita jegale parakataha.
Adita salrango Assam-ni South Salmara district-ni ning·o ga·akgipa Mankachar-o tom·anio agangipako jegalataha.
Mejamangmang Garo Hills-o Assam-oni badingchiwalgiparangko aro kam ka·e cha·na re·bagiparangko napna on·jaha aro badingchiwalani kamrangko bang·bata biaprango name dake kamrangko ka·na man·kujaenga. West Garo Hills (WGH)-ni Tura jilao mejamangmang tom·ao so·sojengjeng ong·kuenganiko nikna man·angaha aro a·jarangona kam ka·na re·bapilna worker-rangni bimingrangko segatchina chanchiangaha. Gipin district-rango ja·ku de·kuja indiba apsan dakgipa bewalko ja·rikna ka·dongsoenga ine aganangaha.
GSU – Phulbari regional unit nakatatanichi jegalataha, jekon tol·gipsa ine aganangaha aro Assam-oni kam ka·e cha·enggiparang aro chonchongipa badingchiwalrangni kosako sasti on·gipa biap dake Meghalaya a·dokko a·dok gipin talatangaha.
“Garo Hills-o ja·dil ja·pangoni ong·manchaenggipako parakatgipako jegale iako matnangataha jeon joltangni organization-rang niamgri kam ka·ani bidingo, napdrabaenggipako nirokjani gimin, jolni gamjinrangko ra·sekani gimin aro gipin aplaoni bosturangchi badingchiwalaniko ra·gopani gimin sing·doaniko dakaha,” ine president Byezer Chuang R Marak aganaha.
“Ia mamlarangko ma·siatani pal ian rasonggribegipa ong·aha, AAMSU dal·begipa jegalaniko dakanichi, jingjengatgipa kattarangko agananichi aro badingchiwalanio ramarangko champengna ka·mikenatanichi dingtang dakgipa ramaonasa ra·angna baseaha. Chinga indake rongtale parakatna ska jeon uamang rama champenga ong·ode chingba rama champenggen. Uamang tangka paisarangko ra·a ong·ode chingaba apsan dakgipa ja·kukon de·gen,” ine Marak aganangaha.
Mankachar-o AAMSU-ni daka gita chingaba apsan dakgipa bewalo manderangko mikrakatna dakna man·gen ine CSO agandapangaha.
“Meghalaya a·doko songreenggiparangko ba badingchiwalgiparangko neng·nikatna jotton ka·angdapa ong·ode bilakgipa ja·kurangko de·anggen jeon mongsonggipa rama jekai Mankachar-oni Guwahati-ona dakanggipa ramako Phulbari aro Garo Hills gita re·sotanggipako champenggen,” ine dol ka·mikenataha.
