SHILLONG: Samtangtango donggiparangko nost ka·anina dal·bea ja·kuko de·aha, East Khasi Hills district-ni administration, district gimiko niamgri ancheng bikotani kamrangko ka·enggipako ta·raken dondipataha, niam pe·giparangko rakgipa niamo ja·ku de·na mikrakataniko on·aha.
Ge·etaniko Bharatiya Nagarik Suraksha Sanhita-ni section 163-ni ning·o nakatataha, chiringrangoni anchengrngko bikotengani bidingo mikrakataniko on·rikrikengaha dingtangmancha Myllem sepang jolni Wahniangleng chibimaoniko bikotako champengataha, chi ringna jakkalgipa aro sambolrangna gamchatgipa ong·anio kamko ka·enga ine authority-rang aganangaha.
Ancheng bikotako check ka·jani a·sel a·arang rurongenga, a·solsolgipa a·brirangoni mesu sam ge·giparang nosto ong·enga aro chio donggipa jonturangni janggirangna kenchakanirang donga aro chiko moila ong·ata jeon uamang salanti jakkalna man·jaha ine official-rang mesoke aganaha. Administration iako samtangtango dongenggiparangko nosto ka·gipa aro manderangni an·seng-baljokanina joljol namgijako ra·bagipa dake talatangaha.
National Green Tribunal-ni gita ja·rikna niamrangko tarie donaha jeon maming ge·etaniko man·gija anchengrangko bikotna man·jawa aro niamgri ancheng bikotgiparangna champenganiko on·aha aro license-rang dongna nanggen ine rongtalen talataha.
A·bri a·solsol dakgiparangoniko niamgri ancheng bikotako district administration champengataha aro authority-rangoni ge·etaniko man·gija chiring chibimarangoni anchengko bikotna man·jawa ine authority-rang ge·etaha. Niamko pe·a ong·ode uamangni kosako rakgipa ja·kuko de·gen ine rongtalen ge·etannio janapaha.
Gital ge·etaniko man·kuna kingking East Khasi Hills district gimiko ia ge·etaniko ja·rikchina District Magistrate ge·etaniko on·aha.
