RESUBELPARA: North Garo Hills a·jao rim·gittanga man·gipa mande saksako police-rang, ta·rake kamko ka·enba, re·anggipa April-ni 25 tarik Robibar salpaksachibara jokatna man·aha.
North Garo Hills Superintendent of Police (SP)-oni koborko on·ani gitade, bading chiwalgipa mande saksako ma·sina man·gijagipa manderang, Bolsong joloniko Ertiga gario rim·gittangangaha ine Robibar attamni 3:00 bajimango, Bajengdoba Police Station-o koborko man·soaha. Koborko man·soa bakan police-rang, Mansinggre-o check point-o donenba, re·ruraenggipa garirangko nisona a·bachengaha.
Police-rangni nisoengmiting somoio, attamni 3:30 bajimango, janapatgipa gariko rim·sona man·aha aro ia garioniko am·sandie nion, rim·gittanga man·gipa mandeko gario nike, uko police-rang jokatna man·aha.
Ia a·selni bidingo police-rang sandiroke nion, dos dakgipa manderang, ia mandeko, Bolsong-Agia ramao rim·soenba, uni motorcycle chabiko ra·seke, uni tangka aro mobile phone-ko ra·e kataha ine ma·sina man·aha.
Matnanga man·gipa manderangko police-rang ma·sina man·aha aro ia a·selni bidingo ainni gita ja·kurangko de·na a·bachengataha ine SP parakataha.
Dos dakgipa manderangko sing·sandion, matnanga man·gipa manderangoni saksa an·tangtangko United Garo People’s Forum (UGPF) minggipa dolni membor-rang ine a·kangaha ine SP parakataha.
Ia a·selni bidingo, Bajengdoba Police Station-o mokordomako segate, ning·tue sandirokna a·bachengataha.
