SWGH-o mikka balwa ta·rakanga, nok-jam aro bijolirang nosto ka·ako man·a

AMPATI: Batanggimin salrangonin Garo Hills-ni dingtang dingtang biaprango, mikkarang dontonggija waaniko nikna man·engon, Robibar walo, South West Garo Hills a·jaoba mikka balwa ta·rakangaha aro mikka balwa ta·rakanganichi bang·a songrangon, nok-jamrang, bijolirang aro ramarang nosto ka·ako man·e, komibeoba sak 76 manderang, neng·nikanirangko chagrongna nangaha ine official-rang parakataha. Mikka balwa ta·rakanichi nok-jamrang nosto ka·ako man·ahaoba da·o dipet mande siani aro saknaanirangko man·ani giminde maming koborrang dongkujaenga ine official-rang u·iataha.
“Mikka balwa bilongbatanggipa biaprangde, Rerapara, Zikzak aro Purakhasia Block-ni ning·o donggipa songrang ong·a,” ine South West Garo Hills Deputy Commissioner (DC) office-oni parakataha.
Ia block-rangoni Rerapara block-an nangchakeako man·batgipa block ong·aha ine janapatengon, “Ia block ning·o, komibeoba song dambongao donggipa nok te·sade chu·gimik nisigalako man·aha aro nok te·bride tong·sa nosto ka·ako man·aha. Ia song dambongao komibeoba sak 36 manderang, neng·nikanirangko chagrongna nangaha,” ine official-rang parakataha.
Official-rangni u·iatani gitade, Zikzak C&RD Block-oba damgittam songrango, nok te·bonga adita nosto ka·ako man·aha aro sak 28 manderang neng·nikanirangko chagrongna nangaha.
Purakhasia block-oba song damgnio mikka balwa bilongbatangenba, nok te·gni aditan nosto ka·ako man·aha aro sak 12 manderang neng·nikanirangko chagrongna nangaha ine official-rang u·iataha.
“South West Garo Hills a·ja gimiko dam 10 songrang nangchakeaniko man·e, nok te·sade chu·gimik nosto ka·ako man·aha aro te 11 nokrang adita nosto ka·ako man·aha,” ine official-rang parakataha.
Mikka balwa ta·rakanganichi, Mellim Primary Health Centre (PHC)-ni solar panel-koba pe·angaha, bijoli line-rangba nosto ka·ako man·aha aro DC office-ona dakanggipa ramaba adita somoirangna champengatako man·aha ine official-rang parakataha.
Official-rangni u·iatani gitade, mikka balwa ta·rakangani ja·man Sombar pringo, dingtang dingtang department-ni manderang, ta·raken kamrangko ka·e, mitam biaprangode bijoliko ta·raken on·pilna man·aha aro ramarangkoba rongalatpilna man·aha.
Mikka balwa ta·rakanganichi nangchakeaniko man·e, neng·nikanirangko man·enggipa nokdangrangna ta·raken dakchakanirangko on·na kam ka·enga ineba official-rang parakataha.