TURA: Tura jillani ning·o donggipa dingtang dingtang a·kingrango, development committee-rangni aro a·dok sorkarini ning·o register ka·gipa dingtang dingtang dolrangni, No Objection Certificate (NOC)-rangko, gipin certificate-rangko aro permit-rangko on·aniara Nokmarangna on·gimin bilrangko re·badeani ong·enga ine Tura jillani ning·o donggipa dingtang dingtang A·king Nokmarang parakatenba, ia a·kingrango Nokmarangna agre darangnaba iandakgipa bilrangko on·jachina, West Garo Hills a·jani Deputy Commissioner-ko didiataha.
Iani bidingo Deputy Commissioner-na sedoatengon, “Nokmarangsa Scheduled a·jarango nirokgipa aro chalaigiparang ong·a aro ia niamkon A·chikrang chengonin ja·rikbaenga. Nokmarangna on·gimin bilko re·badena jotton ka·aniara jatni dakbewal rikbewalko pe·asan ong·aigija, Indian Constitution-ni Sixth Scheduled ning·o Tribal-rangni a·arangko chel·chakna aro jatko chalaianio on·gimin bilrangkoba pe·ani ong·enga,” ine Tura jillani ning·o donggipa A·king Nokmarang parakataha.
Dingtang dingtang gittimni Area Development Committee-rang aro Societies Act-ni ning·o register ka·gimin dolrangna NOC-rangko, gipin certificate-rangko aro permit-rangko on·na bil on·engani gimin jegalatengon, iandakgipa dol aro bimangrangara, sorkarini ning·o register ka·gimin dol aro bimangrang ong·genchimoba ramram dolrangsan ong·aia aro jatni dolrang ong·ja ine A·king Nokmarang parakataha.
“Iandakgipa dolrangko aro bimangrangko bang·batan Nokmarango sing·cheng sanchenggijasa songahani gimin uamang an·tangtangni dongimin niam aro bilrangna agrede Nokmarangni bilrangko jakkalna man·ja,” ine A·king Nokmarang parakataha.
Iandakgipa development committee-rangni, society-rangni aro club-rangni NOC-rangko, gipin certificate-rangko aro permit-rangko on·aniara niamni a·palo ong·a ine janapatskaengon, ian Nokmarangna on·gimin bilrangko pe·ani ong·a aro Nokmarangni bilko District Administration-ba nichanggala gita ong·engani gimin Nokmarangko gisik saatani gita ong·a ine A·king Nokmarang parakataha.
“Uni gimin da·ontal mikkangchide A·kingrango nangchakegipa pilak kamrangnan pilak NOC, certificate aro permit-rangko Nokmaranga aro uamangni bil on·gipa manderangsan on·na man·aignok. Chingni a·king ning·o kam ka·e cha·na aro bading chiwale cha·na gipin biaprangoni re·baenggipa manderangba chingni office-rangonikosa NOC-ko ra·chengna nanggen,” ine Tura jillani ning·o donggipa dingtang dingtang A·king Nokmarang parakataha.
A·kingni ning·o Meghalaya Residents Safety & Security Act (MRRSA)-ko ra·gatna miksongenganikoba Tura jillani ning·o donggipa A·king Nokmarang jegalataha.
