SHILLONG: Indore songjinmao bading chiwalgipa Raja Raghuvanshi-ko a·dokni Sohra jolo so·ote galanina matnangako man·gipa manderangoni mongsonggipa aro so·ota man·gipa mandeni jikgipa Sonam Raghuvanshi-na Shillong-ni kachari, Mongolbar salo jamin on·aha.
Matnangako man·gipa mandena rim·aniko u·iatanio adita kolgapgijanirang donga ine Shillong-ni Additional Deputy Commissioner (Judicial) DR Kharbteng, Sonam Raghuvanshi-na niam mingbriko done jaminko on·aha.
Jaminko man·ani ja·man Sonam-ko Mongolbar attamni 7:00 bajimango Shillong jail-oniko jakgitel wataha aro ua an·tangni ukil baksa ua biaponi re·angaha.
Bharatiya Nagarik Suraksha Sanhita (BNSS)-ni Section 483 ning·o dorgasto galani ja·man Sonam Raghuvanshi-na kachari jaminko on·aha.
Sonam Raghuvanshi-ko re·anggipa 2025 bilsini June 9 tariko, Uttar Pradesh a·dokni Ghazipur-oniko rim·aha aro untalan ja 10 batpile Shillong jail-o donengachim. Raja Raghuvanshi-ko so·otani bidingo 2025 bilsini June 3 tariko, uni kosako Sohra Police Station-o FIR ka·anio pangchake Sonam-ko rim·ahachim.
Matnanga man·gipa manderangni kosako 2025 bilsini October 28 tariko bichal ka·aniko a·bachengatani ja·man da·o dipet ia a·selna segatgipa sak 90 sakkirangoni sakbrikosan kachari sing·sandiengkuachim.
Bharatiya Nyaya Sanhita (BNS)-ni Section 103(1) ning·o dos dakani bidingo matnanga man·gipa mandena u·iatani sakkirangko man·jaha aro uko rim·ani pangchakanikoba una u·iatjaha ine kachari parakataha.
Indake ong·engon, matnanga man·gipa mande kate dongna nangja, sakkirangko taridapna nangja, kacharini hearing daka changantian mikkangpaena nanggen aro permission gri kacharioni re·ongkatna man·jawa ine niamko donenba, Sonam-na kachari, jaminko on·aha.
So·ota man·gipa Raja Raghuvanshi, Meghalaya a·dokona bia ka·e re·baani ja·man 2025 bilsini May 23 tarikonin gimaahachim aro uni manggisiko June jani 2 tarikosa Sohra jolo donggipa a·silangoniko man·ahachim.
Ia a·selni bidingo police-rang so·ota man·gipa mandeni jikgipa Sonam baksana uni ‘mikchagipa’ Raj Kushwaha aro gipin sakgittam manderang, chong·motan Akash Rajput, Anand Kurmi aro Vishal Singh Chauhan-koba rim·aha.
