Assam Schedule-ni ning·o a·a patta renew ka·aniko dontongchina Nokmarang dabia

TURA: A·kingrango a·a pattarangko Assam Schedule-ni ning·o renew ka·ani ba taripiltaina on·aniara Constitution-ni Sixth Schedule-o on·gimin niamrangko pe·ani gita ong·e, Nokmarangna on·gimin bilrangko bilgriatani gita ong·enga ine Tura jillani ning·o donggipa dingtang dingtang A·king Nokmarang parakatenba, Assam Schedule-ni ning·o a·a patta renew ka·aniko dontongchina Garo Hills Autonomous District Council (GHADC)-ko didiataha.
Iani bidingo GHADC-ni Secretary-na sedoatengon, a·kingrango donggipa a·a pattarangko Nokmarang baksa agangrikchenggija ba sing·cheng sanchenggijasa Assam Schedule-ni ning·o renew ka·na ba gital dake tarina a·bachengaha aro ian Constitution-ni Sixth Schedule-o on·gimin niamrangko pe·ani ong·e, Nokmarangna on·gimin bilrangko bilgriatani gita ong·enga ine A·king Nokmarang parakataha.
“Autonomous District Council (ADC)-rangnade Land Record-rangko rakkinasan bilko on·aiaha aro a·kingni a·arangko para on·na ba jakkalnade bilko on·jaha. Assam Schedule-ko ja·rikanichi GHADC, an·tangtangna on·gimin bilna bate bilko jakkalaha aro somoi gita a·a pattarangko tariatanichi a·kingni a·arangoniko kajinarangko ra·aha,” ine Tura jillani ning·o donggipa A·king Nokmarang parakataha.
Indake ong·engon, Assam Schedule-ni ning·o a·a pattarangko renew ka·ataniara, Sixth Schedule-ni ning·o Nokmarangna on·gimin bilko re·badeani ong·a aro niamni a·palo ong·a ine Assam Schedule-ni ning·o patta renew ka·aniko dontongchina Nokmarang didiataha.
A·ani kamrangna A·king ning·o donggipa pilak manderangan Nokmarangni lekkarang baksana No-Objection Certificate (NOC)-ko ra·na nanga ineba Nokmarang didiataha.
A·arangko palengon ba on·sregrikengon, pangnan Nokmarangni on·gipa gital lekkarangchisa dakna nanga maina pattarango biming mingsremangmangaiakode Nokmarangni register-o gatrongja ineba Nokmarang parakataha.
Nokmarangna 25% Awil fee gamna ku·rachakgrikaniko mande ra·e chu·sokatchina aro pattarangoniko man·enggipa kajinaoni 50 percent-ko Nokmarangna on·atchina gitaba Nokmarang didiataha.
A·kingrango Nokmarangni NOC gride, Professional certificate, TNT aro gipin licence-rangko on·jachina gitaba Tura jillani ning·o donggipa A·king Nokmarang, GHADC-ko didiataha.