Assam-o gittamgipa changna BJP sorkariko rikna taria
GUWAHATI: Ia 2026 bilsini gisepo ong·atanggipa dingtang dingtang a·dokni Assembly election result-rangko Sombar salo parakataha aro a·dok dambongaoni Assam, West Bengal aro Puducherry a·dokrangode Bharatiya Janata Party (BJP)-chi dilenggipa National Democratic Alliance (NDA), bang·bata seat-rangkon cheenba, sorkariko rikna tariaha.
Ia bilsini election-o mingsa namen aiao inmananide, West Bengal a·doko, bilsi 15-na Chief Minister Mamata Banerjee-chi dilenggipa Trinamool Congress (TMC) sorkariko BJP-ni bon·atanian ong·aha maina batanggimin bilsi 49-ni gisepo ian West Bengal a·doko BJP-ni skanggipa changna sorkariko rikchenganiba ong·gnok.
West Bengal Legislative Assembly-o dam 294 constituency-rang donga aro ia chang election-o BJP, komibeoba dam 148 seat-rangko chee, TMC sorkariko ra·galna man·aha. Ia koborko seatengmiting somoiona kingkingde, West Bengal-ni gimik dam 293 Assembly seat-rangoni dam 213 constituency-rangnasan result-rangko parakkuenga aro ianoni dam 154-ko BJP aro dam 54-ko TMC chena man·aha.
Assam a·dokoba BJP-chi dilenggipa NDA, ia election-o chepiltaienba, gittamgipa changna sorkariko rikpiltaina tariaha.
Ia koborko seatengmiting somoiona kingking Assam-ni dam 119 constituency-rangna result-rangko parakmanaha aro ia dam 119 seat-rangoni dam 81-ko BJP, damskuko BJP baksa bakrimenggipa AGP aro dam 10 seat-rangko Bodoland People’s Front (BPF) cheaha. Assam-o Opposition dolrangoni Congress dam 14 seat-ko, AIUDF seat damgniko, Raijor Dal-ba seat damgniko aro TMC seat damsako chena man·aha.
Bangki dam 7 seat-rango da·o dipet damsako BJP cheenga, damdokko Congress cheenga ine kobor on·aha. BJP-ni dilgipa aro Assam-ni Chief Minister Himanta Biswa Sarma, Jalukbari constituency-oni seokako man·taiaha indiba Assam-ni Congress president Gaurav Gogoi, Jorhat constituency-o amako man·rikskaaha.
Kerala a·doko Congress-chi dilenggipa UDF, seat-rangko bang·bate cheenba sorkariko rikpiltaina sienga ine kobor on·skaaha. Kerala a·doko Congress, dam 63 seat-rangko aro UDF-o bakrimenggipa IUML, dam 22 seat-rangko cheaha.
Puducherry a·dokoba dam 30 seat-rang donggipa Assembly-o NDA-ni membor-rang, dam 18 seat-rangko chee, sorkariko rikpiltaina sienga ine kobor on·aha. NDA-o bakrimengggipa dolrangoni All India NR Congress dam 12 seat-rangko, BJP seat dambriko aro NDA-o bakrimenggipa All India Anna Dravida Munnetra Kazhagam aro Latchiya Jananayaga Katchi-ba seat damprakko chena man·aha.
Ia apsan salon, dambonga a·dokrang, chong·motan Gujarat, Tripura, Nagaland, Maharashtra aro Karkanata a·dokni damsni constituency-rangna ong·atanggipa by-election-ni result-rangkoba parakataha aro ia by-election-o BJP, Gujarat, Tripura, Nagaland aro Maharashtra Assembly-ni seat damprakko chena man·e, Karnataka-ni seat damgnikon Congress cheangskaaha.
