TURA: Ampati-oni Purakhasia-ona tariangenggipa PMGSY ramako matchotsrangkujaengani a·sel da·o mikkarang waanichi ramarang namjabatatako man·e, ramako re·ruraenggipa manderang neng·nikanirangko chagrongna nangtokenga ine A·chik State People’s Front (ASPF) parakatenba, ia ramako ta·raken matchotate on·china South West Garo Hills a·jani Deputy Commissioner-ko didiataha.
Iani bidingo South West Garo Hills a·jani Deputy Commissioner-na sedoatengon, Ampati aro Purakhasia-ni gisepo tarienggipa PMGSY ramako matchotkujaengani a·sel da·o mikkarang waani ja·man, jolo songdongenggipa manderang aro ramako re·ruraenggipa manderang neng·nikanirangko chagrongna nangtokenga ine ASPF-ni chief organizing secretary Raksim Marak parakataha.
“Ia ramako taria matchotkujaengani a·sel da·o mikkarang waani ja·man ia rama a·dubekrara dake re·ruraenggipa manderangna namen neng·nikaniko on·enga. Unbaksana Chepagri dolongko rikanio, sub-way ba gipin ramako tarie on·a dongjani a·sel mikkarang jime waani somoirango chirang dal·e, re·ruraenggipa manderang neng·nikanirangko chagrongna nangenga aro ian manderangna kenna nanganiba ong·enga,” ine ASPF-ni chief organizing secretary parakatenba, jolo songdongenggipa manderangni neng·nikanirangko namatna gita ia ramako ta·rake tarichina, South West Garo Hills a·jani Deputy Commissioner-ko didiataha.
