PASF-Abong Noga College-o skigipako seokanio niam ja·rikja ine badi ka·a

TURA: PA Sangma Foundation (PASF)-Abong Noga College-o lecturer ba skigipani kamna seokanio, roster system-ko ja·rikja ine South Garo Hills a·jani social activist Greneth M Sangma, West Garo Hills a·jani Deputy Commissioner-na badi ka·doangaha.
Sangma-ni parakatani gitade, ia kamrangna ra·aniko re·anggipa April-ni 29 tariko u·iataha.
“History Department-o Tribal ong·gijagipa candidate-ko skigipani kamna ra·aniara state reservation policy aro 100-point roster system-ko pe·a ga·akengani gimin anga iako raken jegala. Meghalaya a·dokni reservation policy-o Garorangna 40%, Khasi-Jaintia-rangna 40% aro gipin SC/ST dolrangna 5%-ko kangani donga aro ia niamko ja·rikna nangchongmota,” ine Sangma, West Garo Hills a·jani Deputy Commissioner-na badi sedoatgipa chittio janapataha.
Ia reservation policy-ko, bangbang ong·e dongenggipa kam mingantinan dingtangmancha roster-ko done, kamni kri roster system-ko ja·rikna nanga ine Sangma parakataha.
“History Department-o kam ka·soenggipa manderangni gimin am·sandion, ia department-o Tribal ong·gijagipa aro gipin gadangni membor-rangba dongsomanahani gimin ia kamna ra·anio Garorangna chamgimin 40 percent-ko ja·rikjaenga ine ma·sina man·aha. Garorang man·na nanggipa kamko gipin ‘ST ba Non-Tribal gadangni candidate-na on·anide reservation policy-ko pe·ani ga·akenga,” ine Sangma parakataha.
History Department-o kam ka·soenggiparangoni Tribal ong·gijagipa manderangba dongsoahani gimin gital kamna Tribal ong·gijagipa candidate-ko ra·aniara, 100-point roster-ko pe·ani ong·a ineba Sangma matnangataha.
Indake ong·engon, kamni advertisement-o pangchake History Department-o kam ka·giparangko seokani Roster Register-ko mesoke on·na gita college-ni dilgiparangna ge·etaniko on·china Sangma, West Garo Hills a·jani Deputy Commissioner-ko didiataha.
Meghalaya High Court-ni dongimin niam gita pilak college-rangon State Reservation Policy-ko ja·rikna gita ge·etaniko on·chinaba ua Deputy Commissioner-ko didiataha.