WILLIAMNAGAR: Batanggimin March jao, Garo Hills-o so·sojengjeng ong·anina dingtang dingtang NGO-ni dilgiparangko aro chadamberangko rim·anina jegale aro uamangko ta·raken watpilchina dabie, Sukrobar salo, East Garo Hills a·jani dingtang dingtang dolrang, jinma tom·bimonganiko Williamnagar-ni Rongrenggre Govt Higher Secondary School kal·chakramo ong·atangaha.
Ia tom·bimonganio, East Garo Hills a·jaonisan ong·aigija gipin a·jarangoniba dingtang dingtang dolrang, jekai NGCO, ADIL, NAD, GSMC, AIGU, Mothers Union aro uandakgipa dolrang baksana songni nokni Nokma-Sordarrang aro jolo songdongenggipa manderangba bak ra·angtokaha.
Re·anggipa March jao, Garo Hills Autonomous District Council (GHADC) election-o gipin jatrangni bak ra·paaniko jegalengmiting somoio, so·sojengjeng ong·anirangko nikna man·ahani gimin dingtang dingtang dolni dilgiparangko aro so·sojengjeng ong·atanio jak donggipa adita sak chadamberangko police-rang rim·ahachim.
Indake ong·engon, ia tom·bimonganiko ong·atanio, dingtang dingtang dolni dilgiparang aro tom·anio bak ra·enggipa manderang pilakan, ia dilgiparangko aro chadamberangko rim·anina jegale aro uamangko ta·raken watpilchina dabiangtokaha.
Ia tom·bimonganio, Garo Enlightenment Society (GES)-ni president Sillang Goera C Marak, jinmana aganprakangengon, ia tom·bimonganiko ong·atani bidingo jinmana talate on·angchengenba, ia tom·bimonganio bang·gija manderangsan re·bae bak ra·eahani gimin an·tangni suk ong·gijaniko parakataha.
Ia tom·anio gipin dolrangni dilgiparangba aganprakangengon, rim·a man·gipa manderangko ta·raken watpilchina sorkariko didiangenba, ia manderangko watninggija donna ong·ode Garo Hills-o so·sojengjeng ong·piltaiani cholrangba donga ine mikrakataniko on·angaha.
GHADC election-o gipin jatrangni bak ra·paaniko champengna gita Scheduled Tribe (ST) certificate-ko nangtelgipa ong·atchina dabianirang chu·sokgipa ong·ahani giminba ia tom·anio dingtang dingtang dolni dilgiparang, Garo Hills-ni manderangko aro dingtang dingtang dolrangko mittelpilangaha.
Rim·a man·gipa manderangko watpilkujaskal mikkangchiba iandakgipa tom·anirangko ong·ate jinma dabiangkunaba ia tom·anio dingtang dingtang dolrang tik ka·angaha.
