TURA: June jaoni September jaona ong·ronggipa wachini somoi da·o sokbaengahani gimin wachini somoio, chi banani, a·a be·ani aro uandakgipa a·sel ong·anirangona tarisamsoaniko nipilna gita Mongolbar salo, West Garo Hills a·jani District Disaster Management Authority (DDMA), dingtang dingtang department-rang baksa District Coordination Meeting-ko Tura-ni Circuit House-o ong·atangaha.
Ia tom·aniko, West Garo Hills a·jani Deputy Commissioner aro DDMA-ni Chairman Vibhor Aggarwal dilangengon, bilsiantian wachini somoirango chi bananirangchi aro a·a be·anirangchi neng·nikanirangko chagrongna nangrongoba, iandakgipa a·selrangko champengna kam ka·anio olgrokanirangko nikna man·ronga ine manderangna dakchakanirangko on·na kamrangko ka·samsoanio gisiko nange aro kakket ong·e kam ka·na nangani gimin janapangaha.
Dingtang dingtang department-rang, nangani kri kamtangtangko namdapatna man·na gita batanggimin somoirango a·sel ong·anirangko chagronganio skie ra·giminko sakgipinrangnaba agane on·skachina aro an·tangtangni chanchiani baksana ku·pattianirangko on·china gitaba Aggarwal, dingtang dingtang department-ni official-rangko didiangaha.
Wachini somoirango pangnan kamtangtango dongchina aro indinari chutti ra·jachina gitaba Deputy Commissioner, pilak a·jani officer-rangko ge·etangaha. A·sel ong·ani somoirango pangnan junior officer-rang ba chonbatgiparangsa field-rango kamrangko ka·na nangronga ine janapatengon, iandakgipa somoirango dal·batgipa officer-rang an·tangtangan, kamrangko skie on·na man·na gita kamtangtango dongna nanga ine Deputy Commissioner aganaha.
Ia tom·anio, West Garo Hills a·jani Additional Deputy Commissioner aro DDMA-ni Chief Executive Officer JRT Sangma, Power Point Presentation-chi, batanggimin bilsio tarisamsoanirangko mesoke on·angskaaha.
Ia tom·anio, West Garo Hills a·jani SP Abraham T Sangma, ADC aro DRDA-ni Project Director Nipon Hajong, BDO-rang, District Disaster Management Officer James D Sangma, police official-rang, SDMA, Civil Defence aro dingtang dingtang department-ni official-rangba bak ra·angtokaha.
