SHILLONG: India a·songo da·o gittamgipa changna Special Intensive Revision (SIR)-ko dakna siengahaon, electoral roll-rangko namdapatna gita SIR-ko dakanio maming jat baseani grisa, electoral roll-rangko nipilanggen ine Election Commission-oni talataniko on·ataha.
Ia chang SIR-ko dakaniode, Meghalaya a·dokkoba man·chapgnok ine adita salrangna skangsan ECI-oni u·iatahani gimin ian a·doko SIR-ko dakchina dingtang dingtang dolrangni aro a·doko songdongenggipa manderangni dabianiko knachakani gitaba ong·enga.
Meghalaya a·doko, mongsongbate Garo Hills-ni a·kawe jolrango, gipin biaprangoni napsrukbae songdong a·chagiparang bang·en donga ine matnangenba, niam gri electoral roll-rango segatgipa bimingrangko den·galna aro niam gri songdongenggipa manderangko a·rikgalna Special Intensive Revision-ko dakchina dabitokengachim.
Indake ong·engon, SIR-ko dakanio badiaba jatrangkosan ong·aigija niamo pangchake electoral roll-rangko nipilanggen ine a·dokni Chief Electoral Officer (CEO) BDR Tiwari parakataha.
Batanggimin changrango SIR-ko dakanichi bang·a manderangni bimingrangkon, mongsongbate Muslim Bengali manderangni bimingrangko den·galaha ine a·kanganirangko dakenba, SIR dakanio namgijaniko paraktokahachim. Indake ong·genchimoba, iandake a·kanganiko Election Commission jegalatskaaha aro SIR-ko dakon darang jat ba torom basegijasa, niamo pangchake dakenga ine talataniko on·angaha.
A·dokni CEO BDR Tiwari-ni parakatani gitade, Meghalaya a·doko SIR-ko dakna gita Election Commission, pilak kamrangkon tarisomanaha aro ECI-oni tarikrangko u·iatahaon a·doko SIR-ko a·bachengatgnok.
SIR-ko dakanio, a·dokni voter list-rangko name nipiltaianggen aro voter list-rangko nipiltaianio, a·songoni ong·gijagipa aro gipin biaprango biming donggiminkode den·galgen ineba CEO parakataha.
Official-rangni u·iatani gitade, ia SIR Phase-III-o Meghalaya a·dokko man·chape bangki dongkuenggipa dam 22 a·dokrango electoral roll-rangko nipilanggen aro ia SIR-o sak kror 40-mangni gita electoral roll-rango segatgimin bimingrangko nipilanggen.
