Porikkani tarikko ja·mano u·iattaigen
DAMAS: Ia bilsio a·songni nangchongmotgipa kamrangko, chong·motan Census 2027 aro Special Intensive Revision (SIR)-ko dakanio, skigiparangkoba kam ka·atengani a·sel skigiparang neng·nikanirangko chagrongna nangtokengani gimin May-ni 29 tariko ong·atna tik ka·gipa Meghalaya Teacher Eligibility Test (MTET) porikkako sorkari dontongatchengaha ine Sombar salo, Meghalaya a·dokni Chief Minister Conrad K Sangma parakataha.
North Garo Hills a·jani Damas-o ong·atanggipa program-o jinmana aganprakangengon, a·songni nangchongmotgipa kamrangko ka·na nangengani a·sel MTET porikkana tarisamsoanio skigiparang neng·nikanirangko chagrongna nangtokenga ine skigiparangni u·iataniko man·soahani gimin sorkari, skigiparangni neng·nikanirangko ma·sichake, MTET porikkako dontongatchengna tik ka·aha ine Chief Minister parakataha.
Ia bilsio, Census 2027 aro Special Intensive Revision (SIR)-ni kamrangko a·bachengatengahaon, skigiparangkoba ia kamrangko ka·atengani gimin skigiparang, classroom-rango an·tangtangni kamrangko ka·na nangan baksana a·songni nangchongmotgipa kamrangnaba somoiko on·na nangenga ine nikna man·a.
Indake ong·engon, skigiparang dingtang dingtang kamrangko ka·na nange, porikkana tarisamsoanio somoirangko on·na man·jaenga ine nikenba sorkari, MTET porikkako dontongatchengna tik ka·aha aro skigiparang, porikkana tarisona somoirang chu·onge man·china gita ja·mano tarikko tik ka·taina tik ka·aha ine Chief Minister parakataha.
A·dokni bi·sarangna lekka porako on·anio an·tangtangko on·kange aro chakchike kamko ka·engani giminba ua skigiparangko mittelpilangaha.
Chief Minister-ni parakatani gitade, batanggimin bilsirango sorkari rakgipa ja·kurangko de·e, tangka paisarangko bang·en koros ka·anichi a·dokni dingtang dingtang biaprango skul nokrangko namdapatna man·aha indiba skulrangko chalaiani kamrang, nangani kri ong·kujaenga.
A·doko lekka porani gadangko namdapatanio somoiko nanggen indiba kamko chu·sokgipa ong·atna gita sorkari on·kange kamko ka·gen ineba ua ku·rachakaniko on·angaha.
Lekka porani kamrangko namdapatanio sorkari aro skigiparangosan pangchakaigija, ma·a paarang aro pilakkon bakrime kam ka·china gitaba Chief Minister didiangaha.
