MDA sorkarini kamrangko a·kangna jotton ka·enga ine Opposition dolrangko Conrad matnanga

DAMAS: Meghalaya a·doko National People’s Party (NPP)-chi dilenggipa Meghalaya Democratic Alliance (MDA) sorkarini chu·sokatgipa kamrangko mitam opposition party-ni manderang, a·kangdrana jotton ka·enga ine Sombar salo, a·dokni Chief Minister aro NPP-ni national president Conrad K Sangma matnangataha.
North Garo Hills a·jani Damas-o ong·atanggipa program-o jinmana aganprakengon, NPP-chi dilenggipa sorkarini kamrangko a·kange mitam manderang, social media-rango tol·gipa koborrangchi manderangko dilsretna jotton ka·enga indiba sorkari, manderangni namgninan kamrangko ka·angkuaigen ine Chief Minister parakataha.
Namroro silroroaniko ra·bana kam ka·anio a·dok sorkari, pangnan a·dokni manderangko mikkango donesa kamko ka·enga ineba ua aganaha.
Chief Minister-ni parakatani gitade, indita bilsirangna matchotchipgija donenggipa kamrangna mitam manderang, NPP-chi dilenggipa sorkariko matnangna jotton ka·aha indiba ia kamrangko sorkari chu·sokate on·na man·aha.
A·doko pilakni gitan namroro silroroaniko ra·bana sorkari, dingtang dingtang kamrangko ka·engoba, songsalni mitam manderangde sorkariko matnangna jotton ka·kuaienga ineba Sangma aganaha.
Sorkarini kosako jegalanirangko aro jingjengatanirangko dakani bidingo janapatengon, NPP-chi dilenggipa sorkari, maming saloba manderangni kosako an·tangtangna on·gimin bilko jakkale mesokkuja maina namroro silroroaniko ra·bana kam ka·anio manderangan sorkarina mongsonggiparang ong·a ine Chief Minister aganaha.
Ia sorkari, maming saloba manderangko jrip ong·atna bilko jakkalgipa ong·ja indiba pangnan agan-chanchirimanichi namatna kamko ka·gipasa ong·a ineba ua aganaha.
Adita salrangna skang, GHADC election-o Tribal ong·gijagipa manderangni bak ra·paaniko jegale so·sojengjeng ong·anggipani bidingo janapatengon, GHADC election-o Tribal ong·gijagipa manderang bak ra·pana man·jana gita Scheduled Tribe (ST) certificate-ko nangtelgipa ong·atchina manderang aro dingtang dingtang dolrang nangniktokahani gimin manderangni nangnikani gita iakoba sorkari chu·sokate on·aha ine Chief Minister parakataha.
Manderangni aro dingtang dingtang dolrangni nangnikani gitan GHADC-na dingtang electoral roll-ko tarina Delimitation Committee-ko songaha aro ia committee da·o kamrangko ka·engaha ineba Chief Minister parakataha.
Meghalaya a·dok dal·rorona man·na gita sorkarini a·bachengatgipa dingtang dingtang kamrangni giminba ia tom·anio a·dokni Chief Minister, jinmana agan-talate on·angaha.
Purno Agitok Sangma-ni kamrangchisa ia sorkari kamrangko ka·na dilako man·enga ine janapatengon, ia sorkarini kamrangko gipinrang a·kangna jottona ka·genchimoba uamang, jegalanirangko dakani pal, manderangni namgninasa kamrangko ka·na nangnikbataia ine Chief Minister aganaha.