NEET porikkako sepiltaianio chatro chatrirangna korosko gamchina MPYC dabia

TURA: Medical-ko poraina gita admission ra·na adita salrangna skang ong·atanggipa NEET UG 2026 porikkani paper leak ong·a ine matnanganirang ong·katani ja·man ia porikkako den·galpilahani gimin da·o gital dake porikkako ra·piltaianio, NEET porikkako sepiltaina sienggipa chatro chatrirangna pilak nanga korosrangko on·skachina Meghalaya Pradesh Youth Congress (MPYC), a·dok sorkario dabiangaha.
Iani bidingo a·dokni Chief Minister Conrad K Sangma-na seachi u·iatengon, adita salrangna skang ong·atgipa NEET UG 2026 porikkako den·galpile, da·o gital dake porikkako ra·piltaina siengani gimin chatro chatrirang neng·nikanirangko chagrongna nangtokenga ine MPYC-ni president Timjim K Momin parakataha.
Momin-ni parakatani gitade, NEET UG porikkako re·baenggipa June jani 21 tariko ong·atna tik ka·taiaha indiba ia porikkako sepiltaianio bang·bata chatro chatrirangan neng·nikanirangko chagrongna nangtokenga.
“Chatro chatrirang, mongsongbate songadam nokadam aro chel·a biaprangoni re·bae porikkako sena nanggipa chatro chatrirang, NEET UG porikkako den·galpilahani a·sel pilakni gitan neng·nikanirangko chagrongna nangtokenga. Da·o ia porikkako gital dake ong·attaianio, mitam chatro chatrirangde, tangka paisarang chu·onga gita dongpajae, porikkako sepiltaianio neng·nikanirangko chagrongna nangtokenga,” ine MPYC president parakatenba, chatro chatrirangna NEET UG 2026 porikkako sepiltaianio, korosrangko dakchake on·skachina a·dok sorkariko didiataha.
Adita salrangna skang ong·atanggipa NEET UG porikkako seanio bang·bata chatro chatrirangan, re·a doani, donga cha·ani aro dingtang dingtang korosrango tangka paisarang bon·na nangan baksana an·tangtangni gamchatbegipa somoirangkoba indin bon·atna nangaha ine janapatengon, da·o NEET UG porikkako ra·piltaianio chatro chatrirang, korosrang bon·na nangskajana gita tangka paisarangko dakchake on·na nanga ine MPYC dabiangaha.
“Chatro chatrirang, tangka paisani gita neng·nikanirangko man·na nangengani a·sel an·tangtangni poraiani cholrangko gimaatjana gita Meghalaya sorkari, chatro chatrirangna pilak nanga korosrangko on·e dakchakgen ine chinga ka·dongenga,” ine Momin parakataha.