SHILLONG: India a·songo Congress dolko bon·atani ja·man Bharatiya Janata Party (BJP), dingtang dingtang party-rangkoba bon·atna nidinge kamko ka·engani gimin Meghalaya a·doko National People’s Party (NPP)-naba mikrakatsoani gita ong·enga.
Mitam kobor on·timgiparangni aganani gitade, ia bilsini election-o BJP, West Bengal aro Assam a·doko nambate dakna man·ahani gimin re·baenggipa 2028 bilsini Meghalaya Assembly election-o NPP-naba ra·bianirangko on·na sienga ine NPP-ko dilenggipa manderangni gisepo chanchirimanirangko dakengaha.
Salgro salaram jolrangko man·chape a·songni bang·bata biaprangon Congress dolko bon·atani ja·man BJP, West Bengal a·doko Trinamool Congress (TMC)-ko ra·gale gala gita dingtang dingtang political party-rangko ra·galna nidingenga ine politics-ni gimin u·i-ma·sigipa mitam manderang aganaha. Bilsi 15-na West Bengal sorkariko chalaiani ja·man ia bilsio TMC-ko BJP, ra·galna gita man·ahachim.
Apsan daken, New Delhi-oba BJP, Aam Aadmi Party (AAP)-ko ra·galna gita man·aha aro da·o Uttar Pradesh a·dokni Assembly election-oba BJP, Samajwadi Party-ko ra·galna miksonge kamko ka·enga ine kobor on·timgiparang parakataha.
Meghalaya a·dokoba da·o bilsignini gisepon Assembly election-ko ong·atna siengahaon NPP-ni dilgiparang, BJP-na kenna nanganirang dongja ine a·kangatskaaha.
Iani bidingo a·dokni Deputy Chief Minister aro NPP-ni dilgipa Sniawbhalang Dhar, kobor ra·timgipa manderang baksa agangrikengon, “2028 bilsini Assembly election-oba NPP-na maming ra·bianirang dongjawa maina manderang, sana pu·onna nanga uko ma·sigiparang ong·a,” ine aganenba, BJP aro NPP-ni miksonganirangde namen dingtanggrika ine parakataha.
Meghalaya a·dok, BJP-chi dilenggipa BJP sorkarioniko bang·en namgnirangko man·enga ine Dhar a·kangatskaaha.
“2028 bilsini Assembly election-oba BJP, apsan daken seat-rangko man·aigen aro batanggimin chang election-o chinga dam 30 seat-rangko man·ahani gimin 2028 bilsiode iana bateba seat-rangko chena man·gen,” ine NPP-ni dilgipa aganaha.
