Meghalaya-ni chadambeko Kashmir-oni naljokata, CM an·tangan Guwahati Airport-oniko rimchaksoa

TURA: Jammu aro Kashmir-o Meghalaya a·dokoni kam ka·egipa chadambe Genal R Marak-ko jean kal·stapako man·gipako naljokatani ja·man Sonibar salo Chief Minister Conrad K Sangma, Guwahati Airport-o Genal R Marak-ko an·tangan rimchaksoaha.
Official-ni parakatani gitade, Genal, East Khasi Hills-ni Ichamati songni Lummuri-o dongggipa ong·achim, ua Meghalaya a·dokoni bilsi 16 ong·o kam sandina re·ongkatangani ja·man Srinagar-ni restaurant-o bilsi 3-na drae aro sasti on·e kamko ka·ataha.
2026 bilsini April 24 tariko 1971 CM Connect helpline number-ona gisiko so·sojengjeng ong·an baksa call ka·atako man·soani ja·man naljokataniko on·a kamko a·bachengataha. Jammu aro Kashmir-ni authority-rang baksa apsan bakrime Meghalaya sorkari ta·rake am·sandianiko a·bachengataha.
Jammu aro Kashmr-ni Labour Department aro Anti-Human Traficking Unit-oni official-rang team baksa bakrime sandiaha aro adita kontarangni gisepon Srinagar-oniko Genal-ko naljokataha.
Genal-ni nokdangni manderangko dakchakna Magistrate aro Assistant Commissioner Sanjay D Shira-ko niroke kam ka·china sorkari donataha aro uni noktangona naljoke re·bapilna dakchakangaha. Uni man·a nangkuenggipa hajirako uni noktangona sokbapilna skang watatchina aganangaha.
Chadambeni naljoke sokbapilna Chief Minister kusi ong·e aganaha aro naljokatna kam ka·giparangko mittelangaha, Genal uni ka·sabegipa nokdangni manderang baksa batanggimin bilsi 3-o ku·saba agangrikatna aro kobor ra·grikatna man·srangjaha. Manderangni janggiko sorkari maidake naljokatna man·a ia a·selchin bilakgipa mesokaniko on·aha ine ua aganaha.
Mikkangchi uamangni nokdangna aro Genal-na uni nama skaniko on·angaha ine Chief Minister aganaha. “System aro technology-rangchi maidake kam ka·na man·a ian namgipa mesokgipa ong·a aro anga bilongen kusi ong·a jeon CM Connect, kamko ka·na man·a aro saksani janggikoba jokatna man·a aro bang·a gipin namgipa miksonganirang aro dingtang dingtang cholrangchi an·ching CM Connect-ni gita kam ka·angna man·gen ine ua agandapangaha.