TURA: Tura Natya Samity-ni bilsi 100 gapaniko gisik ra·e Sonibar salo, Tura Lower Babupara-ni Natya Samity-o maniaha. Program-o a·dokni skotong Minister Conrad K. Sangma mongsonggipa sokgipa ong·e bakko ra·angaha, unbaksa West Garo Hills a·jani Deputy Commissioner Vibhor Aggarwal; MBOSE-ni Principal Director Rikse R. Marak; West Garo Hills a·jani, Superintendent of Police Abraham T. Sangma; Member of Legislative Assembly Rangsakona, Subir Marak aro Mahendraganj-ni MLA Sanjay A. Sangma aro dingtang dingang department-ni official-rang baksana jolo songdongenggipa manderang program-o dongpae bakko ra·angaha.
A·dokni Skotong Minister Conrad K. Sangma, program-o jinmana aganprakataon, Tura Natya Samity-ni committee-ni President Secretary-rang, memborrang aro ru·uta somoirangoni Committee-ko dilbaenganio dakchakaniko on·enggipa sakantikon mittelpilange, Natya Samity-ko rikbaanio aro songsalna danggike on·anggipa gitcham dilgiparangkoba mande ra·pilskaaniko dakangaha.
Indake battanggimin bilsi ritchasana kingking, Tura Natya Samity-ko namgipa bewalo chalaibae, a·songni dakbewalrangko dingtang dingtang cholrangchi ripinge rakkienganina aro chadamberangna namgipa dakmesokgipa ong·e didiani ong·aninaba committee-ko chalaienggipa dolrangko Sangma mittelangaha.
Una agreba a·dokni Skotong Minister Conrad Sangma, ia salko gisik ra·na kragipa aro mikkangchi Tura Natya Samity-ko namdapatna, Chief Minister Special Development Fund-ni gita lak 50 tangkako on·na ku·chakangjolaha.
