SPF-ko ra·gatanina CM-ko mittelpile SSA skigiparang program-ko ong·ata

TURA: A·dokni dingtang dingtang gadango skigiparangna Structured Pay Framework (SPF) ba bimang done dormaharangko on·na ja·ku de·chakatahani gimin Sonibar salo, All Garo Hills SSA School Teachers Association (AGHSSASTA)-ni gita, a·dokni Chief Minister Conrad K Sangma aro a·dok sorkarina mande ra·pilskaani program-ko Tura-ni Matchakolgre LP School kal·chakramo ong·atangaha aro ia tom·bimonganio, skigiparang, education official-rang, jolko dilgiparang, aro dingtang dingtang gittimni manderangba bak ra·angtokaha.
Ia program-ko ong·atanio a·dokni Chief Minister, MBOSE E-Office Management System aro Accounting System-koba a·bachengate on·angjolaha.
Una agreba, ia tom·anio Chief Minister’s Leadership in Education & Development (CM-LEAD) Fellowship-koba Chief Minister, a·bachengate on·angaha.
Garo Hills-ni dingtang dingtang a·jarango education official-rangni re·rurae nirok sandianirangko nambatatna gita bol 27 garirangkoba Chief Minister, a·bachengate on·angaha.
Ia program-ko ong·atanio a·dokni Chief Minister, jinmana aganprakangengon, ia program-ko ong·atahani gimin SSA Teachers’ Association-ko mittelpilangenba, bang·bata somoirangon official-rang aro skigiparang, rakbee kamrangko ka·genchimoba, mittelpilaniko man·rongja ine aganaha.
Lekka poranian sorkarini mongsongbatgipa daitorangoni mingsa ong·enga ine janapatengon, PA Sangma sagini, lekka porana an·tangko on·kange kam ka·aniko Chief Minister, gisik ra·atpilangaha.
PA Sangma sagini niksamsoani donggipa kamrango pangchakesa da·alo ia sorkari, Lekka porani kamrangko dingtangatna ja·ku de·enga ine Chief Minister aganaha.
SSA skigiparangni dingtang dingtang neng·nikanirangko namatchina dabienggipani bidingo janapatengon, uni MP ong·engmiting somoirangonin ua SSA skulrango skigiparangni neng·nikanirangko namatna jotton ka·enga aro iani bidingo ua baditaba chang Parliament-oba ku·rang on·aha ine Chief Minister aganenba, SSA skigiparangni neng·nikaniara, dormahamangmangnasan ong·ja indiba ian skigiparangni mikkim aro naljokani giminsa ong·a ine talataniko on·angaha.
SSLC porikka aro adita salrangna skang parakatgipa SSLC supplementary porikkani result-rangna Education department aro MBOSE-na an·tangni namgipa skaniko on·angengon, CM Impact guidebook gita dakgipa kamrangchi sorkarini ja·kuko de·ani a·selsa da·alo pass percentage-ni tang·doako nikna man·enga ine Chief Minister parakataha.
Lekka porako namdapatna gita an·tangtangko on·kange kam ka·china gitaba ua skigiparangko didiangaha.
Ia program-ko ong·atanio jinmana aganprakanggipa gipin manderangara, Education department-ni Commissioner & Secretary Vijay Kumar Mantri, AGHSSASTA-ni president Labingstone G Momin, vice president Gilbirth Ch Marak, association-ni secretary Benabith Ch Marak aro gipinrang ong·a.