SHILLONG: Bilsisani Master’s Degree-na North Eastern Hill University (NEHU), maming tarisamsoanirangko dakkujaenga ine Four-Year Undergraduate Program (FYUP)-ko ja·rikgija, Third Year matchota bakan skangoni ja·rikbaenggipa bilsignini Master’s Degree program-na register ka·china NEHU Teachers Association (NEHUTA), NEHU-ni ning·o donggipa dingtang dingtang college-rango Third Year Under-Graduate program-ko poraienggipa chatro chatrirangna u·iataniko on·angaha.
Iani bidingo kobor ra·timgipa manderang baksa agangrikengon, bilsisani Master’s Degree-ko on·na gita NEHU, maming kamrangko tarisamsoa dongkujaengani gimin chatro chatrirangna gimaaniko ra·baani cholrang donga ine je chatro chatrirangan da·o Third Year Undergraduate Program-ko matchotna siengahachim uamangna bilsignini Master’s Degree program-na biming segatanian nambatgipa chol ong·enga ine NEHUTA-ni president Lakhon Kma parakataha.
“Bilsi gittamni ja·man chatro chatrirang, bilsignini Master’s Degree program-ko dakgenchimode, uan chatro chatrirangna nambatgipa ong·enga maina iakon skangonin NEHU ja·rikbaenga. Indiba chatro chatrirang, brigipa bilsikoba dakangkuode chatro chatrirangna gimaani cholrang donga maina da·onan NEHU, bilsisani Master’s Degree program-na tarisamsoa dongkuja,” ine Kma aganaha.
National Education Policy (NEP)-ko ra·gatanio NEHU, undergraduate gadangonin semester-ni kri, taridapani pal post graduate level-kosa taridapaha aro ian chatro chatrirangni poraianio neng·nikaniko ra·baani ong·enga ineba NEHUTA-ni president matnangataha.
FYUP-ni brigipa bilsiko postgraduate course-rang baksa nangdimatna syllabus-ko tarianio university neng·nikanirangko chagrongna nangengaha ine janapatengon, dingtangatani kamrang da·o matchotkujaengon, bilsignini Master’s Degree program-ko NEHU rang·sande bon·atna man·kujawa ine Kma talataniko on·angaha.
Iani giminsa skangonin NEHUTA aro Meghalaya College Teachers Association (MCTA), NEP-ko ra·gatkujachina dabie jegalanirangko dakahachim ine janapatengon, indita mikrakatanirangko on·ahaoba NEHU aro a·dok sorkari, chatro chatrirangni namgnina chanchisamsoani gri, NEP-ko ra·gatna sikkelaha ine Kma matnangataha.
“NEP-ni ning·o FYUP-ko ra·gatna NEHU tarikuja ine chinga a·bachengonin aganahachim. Chatro chatrirang neng·nikanirangko man·jachinasa chinga jegalanirangko dakahachim indiba skigiparangni agananiko knachakjahani a·sel da·alo NEHU, NEP-ko ra·gatanio neng·nikanirangko chagrongna nangengaha,” ine NEHUTA-ni president parakataha.
Iani bidingo NEHU-ni Academic Council baksa ta·raken tom·e chanchirimchina gitaba NEHUTA dabiangaha.
