Union Education Minister baksa tom·e chanchirima
SHILLONG: North Eastern Hill University (NEHU)-ni gital Vice Chancellor (VC)-ko songna gita kamrangko a·bachengataha ine Sombar salo, Meghalaya a·dokni Chief Minister Conrad K Sangma parakatenba, iani bidingo Union Education Minister Dharmendra Pradhan-ko mittelpilangaha.
Iani bidingo a·dokni Chief Minister, Sombar salo, Union Education Minister aro Ministry-ni official-rang baksa tom·e chanchirimangengon, NEHU-ni gital Vice Chancellor-ko songna kamrangko a·bachengataniara University-na ka·dongataniko ra·baani ong·aha aro da·o ia kamko ta·raken simsakani gnang matchotatna nangenga ine Chief Minister parakataha.
University-ni namgnina Vice Chancellor-ko songanio agre somoi ra·chae dongjachina indiba VC-ko seokengon, simsakani gnang kamko ka·china gitaba Sangma, Education Minister-ko mol·molangaha.
Union Education Minister-na sedoatgipa chittio Chief Minister-ni parakatani gitade, NEHU-ko chalaianio da·o neng·nikanirangko chagrongna nangengani gimin je mandean, kamrangko ma·sigipa aro dilna changgipa ong·e, University-ko mangrakbate aro nambate chalaina man·gen, uandakgipa mandekosa Vice Chancellor-na seokna nangenga.
Ia cholko ra·e a·dokni Chief Minister, NEHU Tura Campus-na Pradhan Mantri Jan Vikas Karyakram (PMJVK)-ni ning·o chamatgipa mingbonga project-rangko chu·sokatna gita dakchakaniko on·chinaba Union Minister-ko mol·molangaha. Ia project-rangna Minority Affairs Ministry, gong crore 35 tangkarangko watatmanaha.
“Ia project-rangara, University-nasan ong·aigija Garo Hills gimiknan namen nangchongmotgipa project-rang ong·a maina ian chubata gadangrango lekka porako tang·doatanio mongsonggipa ong·enga,” ine Sangma parakataha.
Captain Williamson Sangma State University (CWSSU)-ko Greenfield development model dake ra·gatenggipani bidingo Union Minister-na talate on·angskaengon, iana dingtangmancha tangka paisarangko dakchake on·china gita a·dokni Chief Minister, Union Education Minister-ko mol·molangaha.
Multi-Disciplinary Education & Research Universities (MERU)-ni ning·o CWSSU-na tangka paisarangko dakchake on·china gitaba Chief Minister, Union Education Minister-ko mol·molangaha.
