PGI Ranking-o M’laya-ni bon·kamgipa ong·anina MPYC suk ong·gijaniko paraka

TURA: Union Education Ministry-ni Performance Grading Index (PGI) 2.0-o Meghalaya a·dok, bon·kamgipa biapko man·taiahani gimin Meghalaya Pradesh Youth Congress (MPYC) suk ong·gijaniko parakatenba, ian lekka porani kamrango NPP-chi dilenggipa MDA sorkarini chu·sokgijaniko mesokani ong·aha ine matnangataha.
MPYC-ni president Timjim Momin-ni parakatani gitade, Meghalaya a·doko lekka porani gita dingtanganiko nikna man·engaha ine a·dok sorkari a·kangengon, batanggimin adita bilsirangni gisepo Education Ministry-ni PGI-o a·dokni komibatgipa biapko man·aniara, a·dok sorkarini chu·sokgijaniko mesokani ong·aha.
Union Education Ministry-ni gital PGI 2.0-o Meghalaya a·dok, 1000 point-rangoni 448-kosan man·e. Akanshi 3-o komibatgipa grade-ko man·aha aro una skangba 417.9-kosan man·aiahani gimin ian lekka porani kamrango, a·dok sorkarini chu·sokgijaniko mesokani ong·a ine MPYC parakataha.
“Ian politics-ni gita matnangani ong·ja indiba Union Education Ministry-ni hisape man·anisa ong·a. Meghalaya a·dokde bilgrigipa a·dokrangoni damsa ong·ja indiba ka·mabatsranggipa biapon ong·enga,” ine Momin parakataha.
Lekka porani kamrango chu·sokgijanirangko pilakon nikna man·enga ine janapatengon, sorkarini see rakkianiko parakani gitade, a·doko donggipa dam 14,582 skulrangoni dam 206 skulrangode poraigipa chatro chatri saksaba dongja aro dam 2269 skulrangoba saksaoni sakskuonasan dongaia ine MPYC president parakataha.
Bilsiantian sak 22,000 bi·sarang, skulrango poraiako dontongenga ineba ua parakataha.
“Poraiako dontonggipa chatro chatrirangni bang·aniara aiao inmanani ong·a maina ian bilsiprako SSLC porikkako seenggiparangoni 40 percent-na bata,” ine Momin parakataha.
Higher Secondary gadango a·dokni bilgrianiko janapatengon, chatro chatrirangoni 47.8 percent-mangni gitasan Class 10-oni Class 11-ona doangenga ine MPYC parakataha.
2026 bilsini SSLC porikkao pass percentage tang·doanikon lekka porani gadang nambatengaha ine sorkarini a·kangani gimin janapatengon, “Chief Minister-ni Guidebook, chatro chatrirangni porikkana tarianio dakchakaniko on·naba gnang indiba porikka ge·sano pass percentage tang·doaiani giminde lekka porani gadang nambatengaha ine a·kangna man·ja maia PGI-ni report-sa lekka porani gadangkode mesoka aro Meghalaya a·dok iano chu·sokgipa ong·jaha,” ine Momin parakataha.