SHILLONG: Meghalaya-ni Umroi Military Station-o Exercise PRAGATI 2026-ko Sonibar salo matchotataha, ian multilateral military exercise ong·a jeon re·baenggipa somoirango ramramgipa security ra·bianirangna armed force-rangni gisepgriko ka·dongchakani aro tarisamsoanirangko skie ra·angaha aro ranta ka·e ninagaha.
Matchotatani somoio sak 6 Vice Chief-rang aro dam 13 dingtang dingtang gipin a·songrangoni sak 40 a·gipi military official-rang dongpaaha. Army Staff-ni Vice Chief Lieutenant General Dhiraj Seth-chi tom·aniko dilaha.
Indian Ocean Region-o PRAGATI-Partnership of Regional Armies for Growth and Transformation-ona India, Bhutan, Cambodia, Malaysia, Maldives, Myanmar, Nepal, Philippines, Seychelles, Sri Lanka, Vietnam, Indonesia aro Laos-onisak 400-na bate bakko ra·angaha.
Military-rangni bakrimaniko dolsa dolgipinko bilakadapatna aro nambate dake mesokna aro operation dakanio u·ia ma·sigrikaniko on·grikna dingtang dingtang a·songrangoni bakko ra·na on·enggipa chol dake ia ranta ka·aniko meli-nangrimgrikanio aro brigimin mande ra·grikanio aro gisiksan ong·anio ranta ka·aniko ong·ataha.
Ranta ka·anio chonchongipa a·brirango aro diltugipa buringrango darerango bobil dolrangko chadrapanio gisik nangbatangaha aro una greba skie on·ani, dake mesokani, drill kal·ani aro rakgipa ranta ka·aniko dakangaha.
Dingtangmancha military-rangni changa sapanio training-ko dakaha iano rock craft, chadrapani aro chadrapgipa drill-rangko chagronga, buringo slai gogrikani, dring aro bus gario chagrongani, IED-ko gimitani aro gipin biapona apjitaniko skie ra·anio man·gopataha.
Ranta ka·aniko dakasan ong·ja indiba gipin a·songrangni dilgiparang baksaba Lt. General Seth, chelchakanio bakrimaniko bilakdapatna ku·mong nangrimanina tom·anio agangrikangaha.
