Rajya Sabha MP-na seokako man·jaoba a·dokna dangdikkuaigen: Shangpliang

SHILLONG: Meghalaya a·doko Rajya Sabha MP-ni candidate-na mingako man·ahani gimin Sombar salo, Mawsynram constituency-ni gitcham MLA aro National People’s Party (NPP)-ni dilgipa HM Shangpliang, party-ni dilgiparangko mittelpilangenba, ua Rajya Sabha MP-na seokako man·jagenchimoba, a·dokna aro Mawsrynram constituency-ni manderangna dangdike on·angkuna kusi ong·aigen ine parakataha.
Rajya Sabha MP-ni candidate-na James K Sangma aro Hamletson Dohling baksana Shangpliang-koba NPP-ni dilgiparang minge donangahachim.
Kobor on·timgiparangni u·iatani gitade, Rajya Sabha election-ko June 18 tariko ong·atna siengani gimin NPP-ni dilgiparang, ia antini gisepon ia sakgittam candidate-rangoni saksako party-ni candidate dake seokanggen.
Iani bidingo kobor ra·timgipa manderang baksa agangrikengon, “James K Sangma aro Hamletson Dohling baksana angkoba Rajya Sabha MP-ni candidate-na mingahani gimin anga namen kusi ong·a,” ine Shangpliang parakataha.
Uni nikanio NPP-ba a·songo jakgitelbatsranggipa aro niamko ja·rikbatsranggipa party-rangoni dolsa ong·a ine janapatengon, Chief Minister Conrad K Sangma baksana Deputy Chief Minister sakgni, chong·motan Prestone Tynsong aro Sniawbhalang Dhar-ni dilanichi NPP, 2018 bilsinin dal·rorona a·bachengaha ine Mawsynram constituency-ni gitcham MLA parakataha.
“Ia party aro sorkarini Meghalaya a·dokna ra·bagipa dingtanganiko an·ching bang·en nikna man·aha,” ine ua aganaha.
Rajya Sabha MP-ni candidate-na sakgittam membor-rangko seokanian NPP-ni a·songo niamko ja·rike rikaniko mesokani ong·a ineba ua aganaha.
“Iandakgipa kamna jeba candidate ong·na man·aia indiba kam ge·sasan dongaiani gimin saksasan re·angna man·aigen,” ine Shangpliang parakataha.
Rajya Sabha MP-na bon·kamgipa candidate-ko seokanide national president aro state president-ni jakosa ong·a ine janapatengon, “Anga Rajya Sabha-ni membor ong·e re·angna man·jagenchimoba, a·dokni gadangon party-na dangdike on·angkuaigen,” ine Shangpliang parakataha.
An·tangni daitorangko janapatengon, “Chinga national president aro state president baksa ku·cholsan ong·e kamko ka·angkugen aro songadam nokadamrango donggipa manderangna, mongsongbate Mawsynram constituency-ni manderangna namroro silroroaniko ra·bana sorkariko dakchakangkugen,” ine Mawsynram-ni gitcham MLA parakataha.