SHILLONG: Assam a·dokni Barpeta Road-o donggipa wholesale market-oniko sam satgipa me·surangko Meghalaya a·dokonaba ra·baaha ine kobor man·soani ja·man, a·dokni Food Safety Department, me·su samjakrangko porikka ra·e nina a·bachengataha.
Assam-ni Barpeta Road-o donggipa wholesale market-o nosto ong·gimin ba sogimin me·surangko gital dake mesokna sam donggipa rongrangko jakkalenga aro ia me·surangko Meghalaya a·dokonaba ra·baaha ine koborko man·soani ja·man department-ni gita me·surangko porikka ra·e nina a·bachengataha.
Sam donggipa rongrangchi potolrangko sataha ine kobor man·ani ja·man Assam-oba bosta 15 potolrangko official-rang rim·e, walni somoion porikka ra·e niaha ine kobor on·aha.
Sam satgipa me·surangko Meghalaya a·dokonaba ra·baani cholrang donga ine manderangni jajrengchakengani gimin aganchakaniko on·angengon, me·surangko laboratory-rango porikka ra·e nina gita food inspector-rangko watataha ine a·doko Food Safety and Standards Authority of India (FSSAI)-ni official saksa parakataha.
“Bazar-rango palenggipa me·surangko porikka ra·e nina food inspector-rangko watatmanaha. Me·surangko laboratory-ona ra·bae porikka ra·e nianggen. Laboratory-o porikka ra·e niani ja·mansa sam satgipa me·surang, a·dokona sokbaama sokbaja, ukode ma·sina man·gen,” ine official aganaha.
Porikkarangko ra·e nianio, komibeoba antignimangde somoiko nangnaba gnang ineba official parakataha.
Indake ong·engon, me·surangko breengon, simsakchina gita manderangkoba department-ni official-rang didiataha.
“Manderangba an·tangtangni ma·sianio pangchake, me·surangko name nipilchina u·iatenga. Iani bidingo department, manderangna ku·pattianiko seenga aro iako Mongolbar salo jinmana mesokatnaba gnang,” ine official aganaha.
Sam satgipa me·surangko ra·baenga inani ja·man porikka ra·e nina a·bachengata
Date:
Share post:
