SHILLONG: United Democratic Party (UDP)-ni adita sak MLA-rang, National People’s Party (NPP)-o napna miksongenga ine jangbingbanganirangko NPP-ni national president aro a·dokni Chief Minister Conrad K Sangma jegalatenba, ian political party-rangni gisepo aro dilgiparangni gisepo agangrikanirangsan ong·aia aro dilgiparangni gisepo tom·e chanchirimanirangko ong·gija dake chanchichipna nangja ine parakataha.
Meghalaya Democratic Alliance (MDA)-o dal·batsranggipa party-rangoni gnigipa UDP-ni adita sak dilgiparang, NPP-o napna miksongenga ine jangbingbangenggipa kattarangna aganchakaniko on·angengon, MLA-rang aro political dolko dilenggiparangni gisepo agangrikanirangara ong·telaigipa gitasan ong·aia aro iandake agangrikanirangko chanchichipna nangja ine Sangma aganaha.
“Dingtang dingtang party-ni dilgiparang, dingtang dingtang kamrangni gimin aro a·dokni nanganirangnaba gisepode tom·e agangrikrongaia. Dingtang dingtang party-rangoni ong·aiani gimin iandake gipin party-ni dilgiparang baksa tom·e chanchirimanirangko ong·gija dake chanchichipaniara kraani ong·ja,” ine NPP-ni national president aganaha.
Chief Minister-ni aganani gitade, dingtang dingtang political party-rangoni ong·genchimoba politician ba dilgiparangara, a·songna kam ka·giparangan ong·ani gimin a·dokni nanganirangnaba tom·e chanchirimanirangko dakrongaia.
Media-rango chanchichipe koborrangko on·jachina mikrakatengon, indakgipa koborrangko on·anichi manderangni gisepo jijagrikanirangko ong·atronga ine Sangma aganaha.
“Dingtang dingtang party aro dilgiparangni chanchirimanirangara, a·songko chalaiani bakan ong·a aro pangnande gipin party-rango napna miksonganirang ong·ja,” ine ua aganaha.
