RESUBELPARA: North Garo Hills a·jao antigimikna Cooperative Week manianiko Sombar salo, Mendipathar Multipurpose Cooperative Society Hall-o matchotataha. Ia program-ko East Garo Hills a·jani Cooperative Societies Office ong·ataha.
Ia Cooperative Week-ko re·anggipa June 29 tarikoni July 6 tarikona, India sorkarini ning·o donggipa Cooperation Ministry-ni changbongagipa Foundation Day-ko maniani bak gita ong·ataha aro ia Cooperative Week manianio, Cooperation Ministry-ni chu·sokatgipa kamrangni gimin a·songni manderangna u·iatna gita dingtang dingtang program-rangko ong·ataha.
North Garo Hills a·jao ia Cooperative Week manianiko matchotatanio, NABARD-ni District Development Manager Donald Sangma, mongsonggipa sokgipa ong·e aganprakangengon, State Cooperative Bank, Rural Cooperative Bank, self help group aro cooperative society-rangna tangka paisani gita dakchakanirangko on·anichi maikai NABARD, cooperative-ni kamrangko mangrakbatatanio kamrangko ka·enga, uarangni gimin agan-talate on·angaha.
Multipurpose Primary Agricultural Cooperative Societies (MPACS)-ko songna gita gital Model Bye-Law-rangko a·bachengatani gimin talate on·angengon, North Garo Hills a·jaoba bakan Multipurpose Dairy Cooperative Societies aro Multipurpose Fisheries Cooperative Societies-ko chalaina a·bachenggnok ine NABARD-ni DDM parakataha.
Iana skang, East Garo Hills Cooperative Societies-ni Assistant Registrar RM Mawlong, rimchaksoani kattarangko aganangaha aro ia Cooperative Week-ko maniani bidingo East Garo Hills Cooperative Societies-ni Senior Registrar JN Sangma talate on·angskaaha.
Ia program-ko ong·atanio dongpae, jinmana aganprakanggipa gipin manderangara, Meghalaya Cooperative Apex Bank (MCAB), Mendipathar Branch-ni Branch Manager B Ch Momin, North Garo Hills Meghalaya Basin Development Authority (MBDA)-ni District Program Manager Chingme Momin, Mendipathar Multipurpose Cooperative Society-ni Founder Sister Rose Kayathinkara aro gipinrang ong·a.
