TURA: Meghalaya sorkarini seokgimin a·a ruronggipa biaprangni bidingo field assessment ba name nipiltaianiko dakna gita Mongolbar salo, India sorkarini ning·o donggipa National Disaster Management Authority (NDMA)-ni technical dol, West Garo Hills a·jani ICP Kilapara-o kulina miksongenggipa River Erosion Mitigation Project-ko niangaha.
A·dokni bang·bata chisamrangon a·arang rurongenganichi manderangna kenchakna nanganiko ong·atengani gimin a·arangni ruronganiko champengna gita cholrangko sandina NDMA-ni technical dol, ICP Kilapara-ona re·baaha.
Ia field inspection-ko dakanio West Garo Hills a·jani District Disaster Management Authority (DDMA)-ba dakchakanirangko on·aha indiba ua somoio West Garo Hills a·jani Deputy Commissioner aro DDMA-ni Chairman dongjani gimin uni pal, West Garo Hills a·jani District Disaster Management Officer (DDMO) James D Sangma, ia field inspection-ko dilangskaaha.
NDMA-ni technical dolo re·bagipa official-rangara, NDMA-ni Senior Research Officer Abhishek Sharma, Indian Institute of Technology (IIT) Roorkee-ni Prof Sumit Sen aro NDMA-ni Senior Consultant SK Ariful Hussain ong·skaaha.
Ia field inspection-ko dakanio, NDMA-ni technical dol baksa Water Resources Department, DDMA aro Kilapara-o donggipa 22nd Battalion Border Security Force (BSF)-ni official-rangba dongpaaha.
