AMPATI: South West Garo Hills a·jani Mahendraganj jolrango, mikkarang jime waenba chirang banna a·bachengahani gimin Mongolbar salo, Mahendraganj constituency-ni MLA Sanjay A Sangma, chi banenggipa biaprangko nieaha aro chi bananichi neng·nikanirangko chagrongna nangenggipa manderangna pilak nanganirangko on·na ku·rachakangaha.
Re·anggipa antirangonin mikkarang dontonggija waengani a·sel Mahendraganj jolrango chirang banna a·bachengaha aro chi banenggipa biaprangko constituency-ni MLA, Mongolbar salo nina re·angenba, duko ga·akenggipa manderangna dakchakanirangko on·na ku·rachakangaha.
Chi banenggipa biaprangko nieani somoio Mahendraganj constituency-ni MLA Sanjay Sangma, jolo songdongenggipa manderang baksaba agangrike, uamangni neng·nikanirangko knatime ra·angaha. Chi bananichi baditana kingking manderang, noksan ong·atako man·na nangaha aro badita nokdangrang, neng·nikanirangko man·na nangenga, iarangkoba MLA hisapjolangaha.
Chi bananichi neng·nikanirangko man·enggipa nokdangrangna mai dakgipa dakchakanirangko on·enga, uarangni bidingo official-rang baksa agangrikengon, duko ga·akenggipa nokdangrangna ja·manchakata grian pilak nanga dakchakanirangko on·china gitaba Sangma didiangaha.
Chi bananichi neng·nikanirangko man·enggipa manderangna nangchongmotgipa bosturangko sokate on·na aro pilak nanga dakchakanirangko on·na gita district administration, line department-rang aro songko nokko dilenggiparangni gisepo apsan nangrime kamko ka·china gitaba Sangma didiangaha.
Neng·nikanirangko man·enggipa pilak nokdangrangnan nanga gita dakchakanirangko on·na sorkari kam ka·enga ineba MLA ku·rachakaniko on·angaha.
