TURA: Garo Hills Autonomous District Council (GHADC)-o kam ka·enggipa manderangna bilsi gittam ong·na sipile dormaharangko on·kujaengani gimin kam ka·enggiparang, kamtangtangko ka·gija jingjengatengani a·sel kamrangko ka·anio neng·nikanirangko man·na nangengani gimin aro kajinarangko man·anio bang·en noksan ong·na nangengani gimin jingjengataniko dontonge kamtangtangona re·bapilchina gita mijal Bristibar salo GHADC-ni gital chief executive membor (CEM) Benedic R Marak, GHADC-o kam ka·enggiparangko didiataha.
GHADC-o kam ka·enggiparangna bilsi gittam ong·na sipile dormaharangko on·kujaengani gimin mijal Bristibar salo, GHADC-ni Non-Gazetted Employees Association (NGEA)-ko dilenggiparang, GHADC-ni gital CEM-ko grongenba, an·tangtangni chagrongna nangenggipa neng·nikanirangko janape CEM baksa agangrikangahachim.
Indake ong·engon, GHADC-ni gital CEM Benedic Marak-ni u·iatani gitade, GHADC-o kam ka·enggiparangni neng·nikanirangko bakande namatna man·jawa ine nikengani gimin ua, GHADC-o kam ka·giparangko Sombar sal dipetan kamtangtangona re·bapile kamtangtangko ka·china mol·molataha.
“GHADC-o kam ka·enggiparangni neng·nikanirangko namatna gitade chingna somoirangko nangkugen indiba chinga uamangni neng·nikanirangko uamang baksa apsan chanchirime namatna miksongenga,” ine GHADC-ni gital CEM parakataha.
Kamtangtangko dontonge jingjengatenggipa manderangoni bang·batan kamtangtangona re·bapiltokna nangnikengahani gimin ua Sombar sal dipet kamtangtangko ka·pilchina gita didiataha ineba Marak parakatah