TURA: Tura bazar-o dokkan dakenggiparangko aro me·su palgiparangko batanggimin salgittamni gisepo COVID-19-na porikka ra·anio sak 21 manderang positive ong·ahani gimin Tura Super Market-o me·su aro bite palenggipa dokkanrang baksana Tura bazar-o manderangni nangchongmota ong·gija bosturangko palenggipa dokkanrangko Sukrobar saloni chipchina gita West Garo Hills a·jani Deputy Commissioner Ram Singh ge·etaniko on·ataha.
West Garo Hills a·jaoba COVID-19-ko man·giparang batrorobaengahani gimin re·anggipa Mongolbar salonin Tura bazar-o dokkan dakenggiparangko aro dingtang dingtang biaprango songdongenggipa manderangkoba sorkari, porikka ra·e nina a·bachengatahachim aro uandaken Tura bazar-o dokkan dakenggiparangoni sak 21 manderang positive ong·ahani gimin Tura Super Market-o me·su aro bite palgiparang baksana Tura Bazar gimikon nangchongmotgipa dokkanrangna agrede chipe donchina gita district administration ge·etaniko on·ataha.
Market committee baksa niamrangko tarichina aro dokkanrangko nirok sandichina gitaba ua Tura Municipal Board-ni chief executive officer-ko ge·etangaha.
