SHILLONG: Meghalaya a·doko COVID-19-ko man·giparang batroroengahani gimin sabisini giproroaniko nambate champengna man·na gita Budbar salo, Meghalaya Legislative Assembly-ni Speaker Metbah Lyngdoh, a·dokni pilak MLA-rang baksa tom·aniko ong·atangenba, COVID-19-ni giproroaniko champengna gita chanchirimdilangaha.
Lyngdoh-ni kobor ra·timgiparangna parakatani gitade, ia tom·anio sorkariko chalaienggipa aro opposition dolgnini MLA-rangan dongpae bakko ra·angaha aro COVID-19-ni giproroaniko champengna gita an·tangtangni u·i-ma·sianirangko sorkarina agan-ku·pattie on·angtokaha.
“Ia tom·anio a·dok sorkari, COVID-ni giproroaniko champengna ja·ku de·ani bidingo aro COVID-ni tikarangko su·ani bidingo MLA-rangna talate on·angaha,” ine Assembly-ni Speaker parakataha.
Meghalaya a·dokni dingtang dingtang biaprango oxygen plant-rangko kuliani bidingo, sagipa manderangna palangrangko bariatani bidingo aro Corona care centre-rangko kuliani bidingoba MLA-rang ia tom·anio chanchirimangaha ineba Lyngdoh parakataha.
“Tom·anio bak ra·gipa MLA-rang pilakan an·tangtangni u·i-ma·sianirangko ia tom·anio sorkarina ku·pattie on·aha aro membor-rang pilakan ia tom·anio gisiko nange bakko ra·tokaha. MLA-rangni ku·pattianirangko sorkari see ra·rikaha aro nanga gita ja·kurangko de·na ku·rachakaha,” ineba Assembly-ni Speaker parakataha.
Ia sal somoirango tikarangko su·anichisan an·tangtangko naljoke rakkina man·gen ineba ua a·doko songdongenggipa manderangko tika su·e ra·china didiangaha aro COVID-ko warachakanio sorkari baksa bakriman baksana pilak nanga dakchakanirangko on·china gitaba Lyngdoh, dingtang dingtang jolni dilgiparangko, NGO-rangko aro toromni dilgiparangkoba didiangaha.
Ia tom·anio Opposition dolni dilgipa Mukul Sangma-ba dongpae bak ra·angengon, manderangni neng·nikanikanirangko niatchina aro manderangni nangnikanirangko chu·sokate on·china sorkariko didiangaha.
Meghalaya a·dokoba bang·a manderangan COVID-ni a·sel janggitangtangko gimaatna nangaha ine janapatengon, mikkangchi sorkarini olgrokenggipa kamrangko namdapatchina gita Sangma didiangaha.
Ia tom·anio a·dokni Chief Minister Conrad K Sangma-ba sorkarina ku·pattianirangko on·ahani gimin pilak MLA-rangkon mittelpilangaha aro MLA-rangni ku·pattianirangko niroke chu·sokatna ku·rachakaniko on·angaha.
