TURA: Meghalaya a·dokni MePDCL-ko gipin a·dokni RECPDCL gita dakgipa company-na pakwatskana MDA sorkarini manchianiko Williamnagar-ni Garo Students Union (GSU) Eastern Zone-ba raken jegalataha.
GSU Eastern Zone-ni president Saljrang Tengrik R Marak-ni parakatani gitade, a·doktangni MePDCL-ko gipin a·dokni company-na pakwate on·genchimode mikkangchi a·dokni chadamberangna kam ka·e cha·ani cholko ra·galani gita ong·gnok aro iako GSU ra·chakna man·jawa.
“MeECL-o casual worker-rangko kamo rakkianide Meghalaya Job Reservation Policy-ni ning·o ga·akja ine adita somoirangna ong·atanggipa Assembly-ni budget session-o a·dokni Power Minister James K Sangma agane, Garo Hills-onikode saksakoba kamo rakkigija Khasi Hills-ni candidate-rangnasa kamko on·aha. Da·o MePDCL-ko gipin a·dokni company-nasa chalaiskana on·na gita MDA sorkari manchienga indiba ian a·dokna aro a·doko songdongenggipa manderangna namen ra·chakna man·gijani ong·enga,” ine GSU Eastern Zone-ni president parakataha.
MeECL-ko chalaina gita gipin a·dokni company-na on·skana sorkarini manchiani bidingo jinmana u·iatahani gimin MeECL-ni Employees Association-ko mittelpilangengon, a·dokni gam-jinko gipin company-rangna on·na sorkarini miksongenganiko jegaltokahani gimin GSU, Khasi aro Jaintia Hills a·jani MLA-rangkoba mittelpilangaha.
Iani bidingo Garo Hills-ni dingtang dingtang dolrang, MLA-rang aro gipin dilgiparangkoba apsan jegalgrimchina gita GSU didiangaha.
MeECL-ko gipin a·dokni company-rangna pakwate on·aniara mikkangchi a·dokna gimaaniko mesokani ong·enga ine janapatengon, nanggenchimode iani bidingo GSU bilaken jingjengatanirangko dakanggen ine GSU Eastern Zone-ni president mikrakataniko on·angaha.
MePDCL-ko gipin a·dokni company-chi chalaiatskana sorkarini tik ka·aniko GSU jegala
Date:
Share post:
