TURA: Nongstoin samba jolo donggipa Shillong-oni Tura-ona dakbagipa ramani pakmarang be·gruna sie dongengani gimin ian ia ram agita re·ruraenggipa manderangna kenchakna nangani ong·engaha ine Niksamso A·chik Society (NAS) parakatenba, ta·raken ia ramako tarichina gita sorkariko didiataha.
NAS-ni general secretary Tengrak R Marak-ni parakatani gitade, ia ramani pakmarang ru·uta somoirangna skangonin be·grubaengahachim aro ia ramako chief minister aro gipin dilgiparangba salantian gita dake re·ruraengoba ia ramako nikja dake dongengachim.
“Ia ramao pakmarangni be·gruanirangko nikengoba sorkari ia ramarangko tarichipgija donenga aro ian ia ramako re·ruraenggipa manderangna da·o namen kenbena nangani ong·engaha,” ine NAS-ni general secretary parakataha.
Maming dal·a a·selrang ong·na skangan ia ramani pakmarangko tarie on·genchimode ia jolrango songdongenggipa manderangnasan ong·aigija ia ramako re·ruraenggipa pilaknan namgni ong·genchim ineba NAS parakataha.
